CO2-mik annikillisaanissamik nalunaarnissaq unnuap qeqqanut killeqarpoq
Silap pissusaa pillugu Københavnimi ataatsimeersuartoqarmat, nunat peqataasut naalakkersuisuisa siulittaasui aqutsisuilu aalajangerput, nunarsuarmi silap kiatsikkiartornera marlunnik kiannerulissanngitsoq
Siunniussamut tassunga nunat EU-mi ilaasortat 27-it, USA Korea Kujalleq, Japan, Indien, Brasilien aamma Kina angusaqarlutik maannamut nalunaarput.
Afrikami nunat arlaqartut nalunaaruteqarsimanngillat, taakkua silaannarmik mingutsitsinermik qanoq anikillisinniarneraat nalunaaruteqartoqarsimanani.
Nunat assigiinngitsut nalunaarutaat, silap pissusaa pillugit ministerimit Lykke Friis Nielsenimit tupaallaatigineqanngillat.
Københavnimi ataatsimeersuartoqarmat isumaqatigiissutigaarput nunarsuarmi tamarmi sila marlunnik kiannerulissanngitsoq tamannalu aalajangiisuusoq, Lykke Friis Nielsen oqarpoq.
Nunat pingaaruteqartut aammalu nunat angisuut arlaqartut isumaqatigiissummut isumaqataanerat Lykke Friis Nielsen-imit iluarisimaarneqarpoq.
Silap pissusaa pillugu nunat tamat isumaqatigiissuteqarnissaannut ikaarsaariarnertut pilersitsisinnaasutut isigineqarsinnaalluni.
