CO2-mik aniatitsineq killilerneqarsinnaavoq matut matullugit innaallagiarlu sipaarlugu
![](/sites/default/files/styles/image_934x467/public/article_images/img_2102.jpg?itok=PKQjKGkb)
![](/sites/default/files/styles/image_934x467/public/article_images/img_2128.jpg?itok=iV0h0uES)
Silap pissusaa pillugu Parisimi isumaqatigiissummut Kalaallit Nunaat ilaassanersoq Naalakkersuisut maanna isumaliutigileruttorpaat.
Kalaallit Nunaanni suliffissuaqarnikkut ineriartortitsinissamut periarfissanik silap pissusaa pillugu isumaqatigiissut, COP21, nunatsinnut killiliivallaarsinnaanera Namminersorlutik Oqartussani isumakuluutigineqarpoq.
Aatsitassarsiornikkut suliaq annertooq ataasiinnarluunniit Kalaallit Nunaata CO2-mik aniatitsinera marloriaatinngortissinnaavaa.
Aamma atuaruk COP21-mi Canadap nunap inoqqaavinut tunngasut tamaviaarutigigaluarpai
Tove Lading piujuaannartitsinissaq pillugu immikkut ilisimasaqartup oqarnera naapertorlugu Kalaallit Nunaanni innutaasut nammineerlutik CO2-mik aniatitsinerup annikillissinneqarnissaanut arlalinnik iliuuseqarsinaapput.
- Eqqaamallugu innaallagissamut attaviit atunngitsut qaminneqarnissaat, ininilu kialaartuni matut ammatiinnarnagit, Tove Lading oqarpoq.
Isumaqatigiissummut angusaqarluarnissamik siunertaqartumut nunarsuarmi nunat tamangajammik akuersaarput - inuit nammineerlutik pilersitaannik silap pissussaata allanngoriartorneranut annikillisaanissamut peqataanissaq siunniunneqarmat.
Aamma atuaruk Lilleholtip Kalaallit Nunaata isumakulunnera paasisinnaavaa
Isumaqatigiissummulli Kalaallit Nunaata ilanngunnissaa ajornakusuussaaq, Kalaallit Nunaanni suliffissuaqarnerup ineriartortinneqarnissaanut periarfissaqaannassappat.
Aatsitassarsiorneq annertooq aallartinneqarpat, Kalaallit Nunaanni CO2-mik aniatitsineq marloriaatinngortinneqarsinnaavoq, taamaaliortoqarsinnaanersorlu Namminersorlutik Oqartussani atorfillit maanna paasinialeruttorpaat.
Piujuaannartitsinissaq pillugu immikkut ilisimasalik lektor, Tove Lading, Sisimiuni Artekimi ilinniartitsisoq, isumaqataalluni oqarpoq, inuiaqatigiit iliuuseqarnermikkut CO2-mik aniatitsineq annikillisissinnaavaat.
Aamma atuaruk COP 21-imi isumaqatigiissutip nunatsinnut tunngasortaa misissorneqarpoq
Taassuma assersuutittut taasai tassaapput, inissiani attartukkani kiassarnermut uuttortaatinik ikkussisoqarpat kiassarnermut atuineq procentinik 20-nik annikkillisinneqarsinnaavoq.
- Uuttortaatit atulerniariartut kiassarneq annikillisinneqartarpoq, Tove Lading oqarpoq.
- Teknologit nutaaliat soorlu internetimut attaveqaatit sukkasuut atorluarnerisigut CO2-mik aniatitsineq annikillisinneqarsinnaavoq, timmisartunik angalalluni ataatsimiigiarnerit ilinniartitsinerillu sipaarutigineqarsinnaammata, tamannalu Artek-imi misilittagaqarfigineqarpoq qarasaasiatigut attaveqaatit atorlugit atuartitsineq atuutilersinneqarmat.
- Ilinniartitsisumik Danmarkimeersumik pinerit tamaasa tikisitsisarniarniarutta taanna timmisartumut ilaasariaqartarpoq, CO2-millu aniatitsinerup annertusarneqarneranut ilapittuutaassaaq, Tove Lading oqarpoq.
Tove Ladingip oqarnerani naapertorlugu Kalaallit Nunaanni CO2-mik aniatitsinerup annertunersaa pisarpoq inuussutissanik tikisitsisarnerup annertunera pissutigalu.
Taamaattumik CO2-mik aniatitsineq anikillisinneqarsinnaavoq puulukinik tikisitanik nerinani aalisakkanik nerisaqarnikkut.