Cimber Air Greenlandilu isumaqatiginninniarput
Cimber Sterlingip tusagassiisartua Signe Thorup isumalluarpoq:
-Air Greenlandimik oqaloqateqarnitta nangineqarnissaanik Air Greenlandimit qaaqquneqarpugut taamaaliorniarpugullu, Signe Thorup oqarpoq.
Cimber Sterlingip Atlantikoq qulaallugu timmisartuussisalernissaminik pilersaarutini januaarip qaammataani unitsippaa.
Cimber Sterling Kalaallit Nunaannut timmisartuussisaleruni ilaasut Kalaallit Nunaanni timmisartoqarfinnut ingerlaqqittussat pillugit Air Greenlandimik isumaqatigiissuteqarniarnera iluatsinngimmat, isumaqatiginniarneq taamani unitsinneqarpoq, Signe Thorup oqarpoq.
Cimber Sterlingip taamatut nassuiaateqarnera Air Greenlandimit eqqumiigineqarpoq, Air Greenland isumaqatiginniarnissamik piumassuseqartuaannarnikuummat.
Air Greenlandip angorusussimavaa Danmarkiliartut Danmarkimi mittarfinnut Cimber Sterlingip timmisartuinut ilaallutik ingerlaqqissinnaanissaat. Tamannali suli anguneqanngilaq.
Timmisartumut ilaasut Kalaallit Nunaannut angalasut Kalaallit Nunaanni mittarfinnut allanut ingerlaqqittussat, Kalaallit Nunaannut tikinnerminni ingerlaqqinnerminnilu nassatatik nammineerlutik tunniuttartussaammatigit, tamanna ilaasunut pisariusartussaavoq.
- Suleqatigiinnissamilli isumaqatigiissuteqartoqassappat illuatungeriit tamarmik iluarisaannik isumaqatigiissuteqartoqartussaasoq Air Greenlandip pisortaanera Michael Binzer oqarpoq.
Air Greenlandip timmisartuinut ilaallutik Damarkiliartut Danmarkimi mittarfinnut allanut ingerlaqqitussat nassatamik assartoqattaarnissaat eqqarsaatiginagit Cimber Sterlingip timmisartuinut ilaallutik, apuuffissaminnut apuuttarnissaat periarfissinneqartariaqartoq Michael Binzer aamma oqarpoq.
Cimber Sterlingimeersut neriupput isumaqatigiissuteqartoqarsinnaasoq, tamatumalu kingunerissagaa, ilaasut Cimber Sterlingimut ilaasut Kalaallit Nunaanni timmisartoqarfinnut allanut ingerlaqqittussat pillugit Air Greenlandimik isumaqatigiissuteqartoqarsinnaasoq taamatuttaaq Air Greenlandip timmisartuinut ilaasut Danmarkimi mittarfinnut allanut ingerlaqqittussat Cimber Sterlingip timmisartuinut ilaasalersinnaassasut, Signe Thorup oqarpoq.
Timmisartortitseqatigiiffiit taakkua marluk oqaloqatigiissimaneranik oqarneq, Air Greenlandimit uppernarsarneqanngilaq.
Air Greenland sapaatit akunneri marluk matuma siornatigut KNR-imit attaveqarfigineqarpoq, timmisartortitseqatigiiffiullu tusagassiisartuata Pia Christensen Bangip oqaluttuuppaatigut isumaqatiginiarnerit nutaartaqanngitsut, Air Greenlandillu Cimber Sterling attaviginissaanik pilersaaruteqanngitsoq.
