Cigaretsip kimmivikui aqqusinerni takussaavallaarput
Arsakkoorfinnik ilioraasoqassasoq siunnersuutigaat. Nuummi innuttaasunik aqqusinerni naapisatsinnik apersuigatta, siunnersuummut isummat assigiingeqaat.Cigaritsillumi kimmivikuinik sumi tamaani takussaasoqarnera Otto Jensen-imut ajornartorsiutaalluinnarpoq.
-Assorsuaq ajornartorsiutaasoraara, peqqutigalugu uanga nammineq pujortartaraluarlunga maangaanaq igitsinissara mianerisorujuugakku, Otto jensen taama oqarpoq.
Aamma atuaruk Tasiilap illoqarfiani saliisoqartussanngorpoq
IA-mi aamma taama isumaqarput, taamaammallu siunnersuutigivaat kommunit inuit tamat naapiffigisartagaanni ingerlaarfiinilu cigaretsinut arsakkoorfinnik ikkussuinissaannut peqqussuteqartut.
Regine Ananiassen-ilu isummamut isumaqataavoq.
-Amerlaqaat inuit maangaanaq eqqaarusunngitsut.
Upernavimmi ukioq 2010-mi akunnerit marluk ingerlanerinnaani cigaretsit kimmivikui 48 kilo-t sinnerlugit katersorneqarsimanerat, IA-mit eqqaasitsissutigaat. Aamma Ilulissani 70 kilo-t akunnerit pingasut ataallugit katersorneqarsimapput.
Aamma atuaruk Aningaasaqarnermut siunnersuisoqatigiit aningaasanut inatsimmut siunnersuut isornartorsiorpaat
Partiimi Isumaqarput ajornartorsiut taamanernik pitsaanerulersimassanngitsoq. Arsakoorfinnillu ilioraasoqarpat atorluarneqassasut inuit isumaqarput.
-Assut atorluarneqassapput, takussunartullu ikinnerussagaluarput, Aaneeraq Nielsen oqapoq.
Otto Jensen kimmivikut aqqusinitsinni takussaasut kusaginngikkaluaqalugit, arsakoorfiit iluaqutaanissaat ilimasuutiginngilaa.
-Takusartakakka malillugit ilimaginngilara iluaqutaangaarnissaa, kalaallit taama pinngortitamut paarinninngitsigitilluta imaluunniit suusupiginnitsigaluta, ingammik illoqarfiuk iluani ingasappoq.