CIA pillugu apeqqutit takkussuupput
CIA-p nunarput aqqusaarlugu inatsisitigut unioqqutitsilluni timmisartuussisarsimanerisa arlaannaannulluuniit attuumassuteqanngitsunit misissorneqarnissaanut aningaasartuutissat annertussusaat eqqarsaatigalugit suna naatsorsueriaaseq atorneqarsimanersoq Folketingemi Siumup ilaasortaatitaata Doris Jakobsenip ullumi nunanut allanut tunngasunut ministerip, Villy Søvndalip nassuiaateqarnissaa piumasarivaa.
SF-it siulittaasuata Villy Søvndalip, Socialdemokraatit kiisalu Radikale Venstret peqatigalugit qineqqusaarnerup nalaani suliap misissorneqarnissaanik piumasaqaraluarnerminnik isumartik allanngortereeraallu, taassuma apeqquteqarnera pivoq.
Taassuma nunanut allanut tunngasunut ministerinngorlaatut misissuisoqarnissaa pisariaarussimasoraa, oqarnermisut "utersaartunik akisoqisunillu misissueqattaarnerit" aarleqquteqarneq tunngavilersuutigalugit.
Taassuma isummaminik allanngortitsinera pakatsinaqalunilu akuersaarneqarsinnaanngilaq, Doris Jakobsen ullumi oqarpoq. Søvndalimut apeqquteqarnermi saniatigut aamma oqaatigaa, Naalakkersuisut siulittaasuat, Kuupik Kleist danskit naalakkersuisuinut saaffiginninnissaa piumasarissamaarlugu, tigusanik timmisartuussisarsimagaanerit arlaannaannulluunniit attuumassuteqanngitsunit misissorneqarnissaa pillugu kalaallit kissaatigineqarnera ataqqineqartariaqarmat. Naalakkersuisummi taamaaliornermikkut neriorsuutigisatik qatangiinnartitsikkaaat, taanna ullumi taama oqarpoq.
Ilutigitillugu Dorisip nammineq partiiata siulittaasuata, Aleqa Hammond suliaq pillugu ullumi § 37 atorlugu apeqquteqarpoq. Taassuma paaserusuppaa, CIA-p Kalaallit Nunaat qulaallugu unioqqutitsillutik timmisartuussisarsimanerata qulaajarneqarnissaat eqqarsaatigalugu Naalakkersuisut qanoq qulakkeerinninniarnersut.
Taassuma apeqquteqarnerminut tunngavilersuutigaa, Naalakkersuisut siornatigut ilisimatitsissutiginikuummaasuk, Naalakkersuisunngorlaat aarlaannaannulluuniit attuumassuteqanngitsunut misissuititsinissamik CIA-p Kalaallit Nunaat qulaallugu unioqqutitsillutik timmisartuussisarsimanerat qulaajarneqarnissaannik piumasaqarnissaat utaqqimaarusussimassuk.
Inatsisartuni Nunanut aallanut tunngasunut Sillimaniarnermullu ataatsimiititaliami ilaasortat Siumumeersup, Demokraatineersup kiisalu Atassummeersup piumasaraat, suliaq Naalakkersuisut siulittaasuaata danskit naalakkersuisuinut saaffiginnissutigissagaa. IA-p ilaasortaatitaa Juliane Henningsen kisimi isumaqarpoq, suliaq silatusaartumik passunneqartariaqartoq, paasissutissallu saqqumereersut atuaqqissaaqqaariarlugit iliuseqartoqarnissaa eqqarsaatigineqartariaqartoq.
