Christianiami unnuaq eqqissiviilliortoqarpoq
Politiit Christianiap silatinnguani Prinsessegademi ikuallatsitanik qatserinialeramik imermik seqqalittaatitaartik atoqqaarfissiorpaat. Politiit oqaaseqartitaat Henrik Suhr oqarpoq, politiit qatserinerisa nalaani akerliussutsimik takutitsisut ilaat puujaasanik ikuallajasunik immikkanik politiit tungaannut milloortut qimagukkallartittariaqalersimallugit.
Isiginnittut oqaluttuarnerat malillugu akerliussutsimik takutitsisut Christianiamut qimarrapput. Politiit amerlaqisut akersuutsillutik atortakkaminnik assukkersorlutik qimmilisaarlutillu Christianiamut tamatuma kingorna isaapput amerlasuunillu tigusarinnillutik, isiginnittullu oqaluttuarnerat malillugu akerliusut Christianiami imerniartarfimmut isaasimasut aamma politiinit tigusaqarsimasut.
Kalaaleq, imminut "Ole"-mik taaqqusoq, politiit isaanerisa nalaani kalaallit najugannaavata Stjerneskibip silataaniippoq. "Ole"-p oqaluttuarnera malillugu kalaallit Stjerneskibip eqqaaniittut politiinit iseqquneqarput, taamaammallu kalaallinik tigusaasortaqanngillat.
Kalaallit taamaasillutik akerliusunit avissaartinneqarput, "Ole" oqaluttuarpoq nangillunilu:
Politeeq Stjerneskibip matuata eqqaanut pigami kalaallit tamaasa iseqquai. Taava pisup nalaani taqqamaneerrappugut, takusinnaasattullu nunani allamiuinnaat tigusarineqarput.
Tigusarineqartunit 194-init inuit 188-it unnuap ingerlanerani iperagaapput. Sinneri arfinillit inatsit tunngaviusoq naapertorlugu killisiorneqarput atorfilinnillu sulisunik peqqarniisersimasutut unnerluunneqarlutik.
