Champions Leaguemi arsaattut Greenpeacemi akornusersorneqartut
Baselip Schweitzimeersup Schalke 04-llu Tysklandimeersut Champions Leaguemi unammineranni minutsit arlaqanngitsut ingerlareersullu arsarneq unitsinneqartariaqarsimavoq.
Greenpeacermiut Baselimi arsaattarfissuup qalianut imminnut ningillutik arsaattarfissuup qaliaanit allagartarsuarmik angisuupilussuarmik siaarsisimapput.
Allagartarsuarmi Schalke 04-p pingaarnertut aningaasaliisuanut Ruslandimi nukissiorfimmut Gazpromimut akerliussutsimik allaqqavoq: 'Gazprom. Don't Foul The Arctic', 'Gazprom. Issittoq aserorteqinagu', Greenpeacep sapaatit akunnerat kingulleq russit uuliasiorlutik qilleriviannut akerliussutsimik takutitsisimanerat innersuussutigalugu.
Nukissiorfissuaq Qalasersuarmi russit pigisaanni uuliasiornissamik gassisiornissamillu isumaqatigiissuteqaqqammerpoq. Taamatullu pilersaaruteqartoqarnera avatangiisinut tunngatillugu Greenpeacemit akerlerineqarpoq.
UEFA-mi præsidenti Michel Platini arsaattarfissuarmi najuupput, taannalu arsaannerup minutsialunni unitsikkallarneqarnerani pisarnermisut qasoqqarpasillunilu isumaluppasippoq.
UEFA-p kingorna nalunaarutigaa arsaattarfimmi isumannaallisaasoqarsimannginnera pissutigalugu timersoqatigiiffik Basel akiliisinneqarumaartoq.