Cataloniap siuttua Spaniami eqqartuussiviit qullersaanit tunuartitaasoq
Cataloniap Spaniamit avissaarluni namminiilivittunngornissaanut siuttoq, Quim Torra, naalasseriitsuunini pillugu suliunnaarallartinneqartariaqarpoq. Spaniami eqqartuussiviit qullersaat ataasinngornermi taama aalajangiivoq.
Cataloniami nunap immikkoortuata eqqartuussiviata siorna aalajangiinera taamaasilluni eqqartuussiviit qullersaannit tapersersorneqarpoq. 57-inik ukiullip Torrap pisortat suliffeqarfiutaanni ukiup aappaata qeqqanik sivisussusilimmik suleqqusaannginnera nunap immikkoortuata eqqartuussiviata aalajangerpaa.
Eqqartuussivitsigut suliareqqitassanngortitsinermi aalajangiineq aallaavigalugu, Torrap Cataloniap præsidentiatut ingerlaannartumik atuutilersumik tunuarnissaa aalajangerneqarpoq.
Cataloniap namminiilivittunngornissaa pillugu sukataaruteqarnermi allagartarsuit assigiinngitsut allaffimmini, Cataloniamilu pisortat allattoqarfiini assigiinngitsuni Spaniami inatsisartunut siorna qinersisoqarnissaanut atatillugu nivinngaassorneqarsimasut peerneqarnissaat Torrap taamanikkut akuersaarumanngilaa, tamannalu pillugu naalasseriitsutut aalajangiiffigineqarluni.
AAMMA ATUARUK Avissaarniaqatigiit sivisuumik parnaarussassanngortinneqartut
Spaniamiut eqqartuussivianni ataasinngornermi aalajangiinerup, Cataloniap namminiilivittunngornissaanut sukataarutiginnittunit akuersaarumaneqarnani eqqissiviillioqqinnernik aallartitsinissaa politikkikkut alaatsinaattut ernummatigaat.
Cataloniap namminiilivittunngorluni Spaniamit avissaarnissaa, Cataloniami innuttaasut 7,5 millionit akornanni isumaqatigiinngissutigineqaqaaq. Cataloniami innuttaasut isumasiorneqarmata Cataloniap namminiilivittunngornissaanut tapersersuisut 42 procentiupput, akerliusullu 50 procentiullutik.
Qumi Torrap præsidentiuffiata Pere Aragonesimit taarserneqarnissaa ilimagineqarpoq.
Cataloniami inatsisartunut 2021-p aallartinnerani qinersisoqarnissaa Aragonesip kaammattuutigiumaaraa naatsorsuutigineqarpoq.