Cataloniap præsidenterisimasaa Belgiap oqartussaasuinut tunniutiinnartoq

Puigdemontip allaffeqarfia taama oqaaseqaateqartoq tuluit aviisiat The Guardian allaaserisaqarpoq.

Carles Puigdemontip tigusaanissaanik sapaatit akunnerata aallartilaarnerani piumasaqartoqareersorlu Cataloniap præsidenterisimasaa imminut tunniuppoq. Pineqartormi Cataloniap avissaarnissaanik siuttuulluni suliniuteqartoq Belgiamut 2017-imi qimaavoq.

Naak Puigdemont tunniutiinnaraluarluni Spaniamut tunniunneqannginnissi piumasaqaatigigaa nalunaarutigineqarpoq.

Avissaarniat siuttorisimasaasa parnaarussassanngortinneqarnerisa kingunerisaannik Spaniami ulluni kingullerni eqqissiviilliornerit annertupput.

AAMMA ATUARUK Avissaarniaqatigiit sivisuumik parnaarussassanngortinneqartut

Spaniami eqqartuussiviit qullersaanni ataasinngormat pineqaatissinneqarput. Præsidentimut tullersortaasimasoq Oriol Junqueras, pineqaatissinneqartut ilagaat, taannalu ukiuni 13-ini parnaarussassanngortinneqarpoq. Avissaarniat siuttorisimasaat allat arfineq pingasut ukiut qulingiluat aqqaneq-marlullu akornanni parnaarussassanngortinneqarlutik pineqaatissinneqarput.

Puigdemontimut tigusarinninnissamut piumasaqaat nutaaq ullormilu tassani nassiunneqarpoq. Tamatumani piumasaqaammut assingusoq piumasaqaat alla Spaniami eqqartuussiviit qullersaasa 2018-imi itigartitsissutigaat.

Ataasinngormat pineqatissiinerit Cataloniami illoqarfiit pingaarnersaanni, Barcelonami, akerliussutsiminik takutitsisut politiillu aporaanneranni nakuusernerit pisimammata eqqissiviilliortoqarneranik kinguneqalertupallapput.

Avissaarniat aqutsisui ullumikkut tallimanngornermi nuna tamakkerlugu suliumajunnaartoqarnissaanut akerliussutsimillu takutitsisoqarnissaanut kajumissaarisimapput.

/ritzau/