Carsten Frank Hansen: Uukapaatitaasimavunga

Aviisimut Fyens Stiftstidendemut ullumi tamanna oqaatigaa.

Aningaasaqarnermut Naalakkersuisoqarfimmi pisortanngoraluartoq taanna siorna septembarimi ullut marluinnaat atorfeqareerluni tunuartariaqalerpoq, tassa Danske Andelskassers Bankip Fynimi immikkoortortaani Odensemi pisortatut atorfeqarnermi nalaani peqquserluuteqarsimasutut unnerluutigineqarsimasoq paasineqarmat.

Allakkami unnerluutiginnissummi allassimasut naapertorlugit, Carsten Frank Hansen 335.000 koruuninik pissarsisimaneragaavoq, aningaasat taakku piginneqatigiiffimmut atukkiussassatut nammineerluni akuersissutigisimavai.

Carsten Frank Hansenip paatsoortoqarsimanera aalajangiusimavaa, pinngitsuutitaanissanilu naatsorsuutigalugu.

- Taama killittoqarnera soorunami tupigusuutigaara. Unnerluutiginnissummi allassimasorpassuit ilisarisinnaanngilakka, annerusumilli oqaaseqarfigitinnagit illersuisora oqaloqatigeqqaartariaqarpara. Taama ittumik suliassaqalersillugu marlunnik assigiinngitsunik isiginiagassaqarpoq, illuatungaannaali maannamut tusaaniarneqarsimavoq. Pisumut qanoq isiginninnera eqqartuussivimmi saqqummiunneqassaaq, Fynimi aviisimut taanna oqarpoq.

Taassuma salloqittarneqarsimalluni oqaatigaa.

- Salloqittarneqarsimavunga, illuatungikka eqqunngitsumik oqaluttut uppernarsassavara, Carsten Frank Hansen aviisimut oqarpoq.