Canadami naalakkersuisut toqqarneqartut
Canadami naalakkersuisunngortut Justin Trudeaup saniatigut tassaapput mnisterit 36-t, angutit 18-it, arnallu 18-it.
Angutimmi arnallu naligiissitaanissaat pingaartillugu, Trudeaup oqaatigiuarsimavaa.
Ministerit 36-t nutaat pisortatigoortumik, persuarsiutigineqartumillu Canadap generalguvernørianit Julie Paquettemit ullumi ivertinneqarput, tusagassiutinullu innuttaasunullu saqqummiunneqarlutik.
AAMMA ATUARUK Nunavummiu inuusuttoq Canadami inatsisartunut qinerneqartoq
Siornatigut ministeriusimasut nutaallu ministerinngortut 36-t akornanniippt, ministeringortullu akornanni Canadami nunap inoqqaavinut pingaaruteqarsinnaapput.
Dan Vandal, nunap immikkoortuanit Manitobameersoq, Canadap avannarpasissuanut tunngasunut ministerinngorpoq.
Taanna inunnik isumaginnittutut ilinniarsimasuuvoq, nunallu inoqqaavisa inuusuttortai ukiorpassuarni ilaatigut sullissimallugit.
Marc Miller, Montrealimeersoq, eqqartuussissuserisuuvoq. Taassuma Canadami nunap inoqqaavisa innuttaasullu allat akornanni saammaasseqatigiittoqarnissaa pingaarnertut suliassarissavaa.
AAMMA ATUARUK Naggueqatigiit Inuit siuttui Canadami qinigaaqqittunut pilluaqqussuteqartut
Taassuma saammaasseqatigiittoqarnissaa siunertaralugu indianerit Mohawkit oqaasii ilinniarsimavai, Mohawkillu oqaasii atorlugit Canadap inatsisartuini siullersaalluni oqalugiartuulluni.
Taanna nunap inoqqaavinut tunngasunut ministeritut ivertinneqarpoq.
Ministerinngortut nutaat, Canadami inatsisartut decembarip ulluisa tallimaanni pisortatigoortumik ammarneqarpata sulilissapput.