Canadami nunap inoqqaavi issinnerujussuanit eqqorneqarput

Januaarimi ukiuni qulikkaani kingullerni aatsaat taama issitsigisoq Canadami silasiortut nalunaarutigaat. Silap pissusia Polar Vortex pissutaatinneqarpoq, tassa Amerika Avannarliup Issittortaani anori nillingaatsiartoq Canadap kujasinnerusortaanut USA-llu ilarujusuanut anngussimalluni.

Montrealimi sisamanngormat tallimanngornermilu 29-nik issippoq. Arnat angerlarsimaffeqanngitsut pingasut, taakkunannga naggueqatigiit Inunneersut marluk, indianererlu ataaseq, Montrealimi januaarimi qiullutik toqupput.

Iqalunni angerlarsimaffeqanngitsut pillugit suliniutit nutaat aallartisarneqarput.

Tassa issinnerujussua pissutaalluni angerlarsimaffeqanngitsut unnuiffigisinnaasaat nutaaq sapaatip-akunneri pingasut matuma siornatigut ammarneqarpoq.

Inuit ikinnerpaamik 15-it tassani unnuisarmata suliniut iluatsilluartoq, angerlarsimaffeqanngitsut unnuiffigisinnaasaannik aqutsisut Dan Laffin Matthew Clarkilu CBC Newsimut oqarput. Angerlarsimaffeqanngitsut unnuiffigisinnaasaat marsip naanissaata tungaanut ammasussatut pilersaarutigineqarpoq.

Canadap Issittortaata kippasinnerusortaani suli issinneruvoq. Inuvialunni illoqarfiit pingaarnersaanni Inuvimmi anori ilanngullugu 39-t tikillugit sapaatip-akunnerata ingerlanerani issippoq, Qalasersuarmit issinnerulluni.