Umiarsuit Canadap kangimut sineriaata avataani arfernut akornusersuutaasut
Arfiviit qilalukkallu Issittumi illersorneqarnissaat pillugu iliuuseqartoqarnerusariaqarpoq. Canadami misissuinermi inernerit saqqummiunneqaqqammersut tamanna takutippaat.
Allattoq Marianne Stenbæk, Montreal, Canada
maajip 09-at 2018 07:08
Nutserisoq Mads Lynge
Silap pissusiata allanngoriartornera pissutigalugu imaata sikua sukkanerujartuinnartumik aakkiartorpoq, Sullualukkut Ualerngullu Tarajuatigut angallanneq pisariinneruleriartuinnarluni. Umiarsuit anginerit amerliartuinnartut tassuuna ingerlaarsinnaanngoriartorput.
Arfivinnut qilalukkanullu tamanna aarlerinaateqarsinnaavoq, arferimmi akornusersorneqarnerulersinnaapput, ilaatigullumi aporneqarsinnaallutik.
Canadap kangimut sineriaani tamanna takussaalereerpoq, arfiviimmi ilaat toqungasut 17-it siorna aasaanerani siumorneqarput, ilaat umiarsuarnit aporneqarsimallutik.
Ualerngup Tarajuani Sullualummilu immakkut angallannermi malittarisassanik sukannernerusunik malittarisassaqalernissaa Canadami misissuisitsinermi erseqqissaatigineqarpoq.
