Canadap Issittumi siulittaasuunissaa suliniaqatigiiffiit siooragaat

Issittumi Siunnersuisooqatigiit Kirunami pingasunngormat ataatsimiinnissaanut atatillugu nunap inuiisa suliniaqatigiiffii Greenpeacep aaqqissuusagaanik Issittumi pisinnaatitaaffiit pillugit isumasioqatigiinnermut peqataapput, isumasioqatigiinnerlu Kirunami aamma ingerlanneqarpoq. Tassunga peqataasut arlallit Canadap Issittumi Siunnersuisooqatigiinni siulittaasuuffeqalernera tatiginartinnagu oqaatigaat.

- Siulittaasunngortup ministeriunitta (Stephen Harperip, aaqq.) anguniagai malissavai, tassalu Issittoq suliffissuaqarnermut ineriartortitsinermullu ammaanneqarnissaa - issittumilu avatangiisit najugaqartullu eqqarsaatiginngivillugit. Isumaqarpunga Issittumi Siunnersuisooqatigiinni soqutigisanik aporaatsitsisoq, Issittumimi pinngortitami ataqatigiinneq sunnertiasoq illersussallugu Siunnersuisooqatigiit suliassaraat, Francois Paulette Canadami suliniaqatigiiffimmit Dene Nationimeersoq oqarpoq.

Greenpeacettaaq siulittaasoq Canadamiu isumalluarfiginngilaa.

- Canadap apeqqutinut assigiinngitsorpassuarnut tunngatillugu iliuuserisartagai nalinginnaasumik ernumanartoqartittupilussuuagut. Kyotomi isumaqatigiissut peqataaffigiunnaarpaa aammalu issittumi inuiannik pitsaavallaanngitsumik pissuseqartarsimalluni. Ajunnginnerusumut ingerlariaqqittoqarnissaa isumalluarfigivallaanngilarput. Issittumi Siunnersuisooqatigiit angusaqarfioqqinnginnissaat takorloorsinnaalereerparput, tassalu susoqarnavianngitsoq, Greenpeace Nordenimi allattaaneq Mads Flarup Christensen oqarpoq.

Canadamiut siulittaasuutitaata Leona Aglukkap siulittaasuunermi nalaani Business Forumimik nutaamik pilersitsinissani pilersaarutigaa, tassanilu suliffeqarfiit Issittumik soqutigisallit misilittakkaminnik avitseqatigiittassapput. Avatangiisilli qaangiinnarneqarnerinik tamanna kinguneqassanngitsoq neriorsuutigaa.

- Issittoq pillugu aalajangiisartuusugut aalajangiiniarnitsinni suliffeqarfiit unammilligassaannik isiginiartarnissarput pingaaruteqarsoraara. Issittumi Siunnersuisooqatigiit maannamut sulisarsimanera ilisimatuussutsikkut tunngaveqarnerusimavoq - tamanna suliffeqarfinni qanoq atorneqassagami? Tamanit isiginiarnissaa qulakkeertussaavarput.

Leona Aglukkaq Nunavumi peroriartorpoq issittormiullu pingaartittupilussuullugit, taanna ima aamma oqarpoq:

- Ilisimatuut illersuiniaqatigiiffiillu Issittumi najugallit ineriartornermillu sunnigaanissaat eqqumaffigisariaqarpaat. Issittup avataani aalajangiinerit Issittumi najugalinnut, uumasuunut, nunamut imaanullu kingunerlutsitsinnginnissaat qulakkeertussaavarput