Canadap EU-llu killilersugaanngitsumik niueqatigiinnissamik isumaqatigiinniarnerat iluatsinngitsoq
Belgiami nunanut allanut tunngasunut ministeri, Didier Reynders, nutaarsiassaqartitsivik AFP naapertorlugu taama ilisimatitsivoq.
Ataatsimiinneq ullumi sisamanngornermi ullaap tungaani nangeqqinneqassaaq.
Belgiami premierministeri Charles Michel naapertorlugu, nunap immikkoortuani Vallonienimi ernumassutigineqartut, isumaqatigiissuteqarnissamullu maannamut akimmisaartitsisut, eqqissisarniarlugit oqaaseqaammik ataatsimoorussamik suliaqarneq nanginneqassaaq.
Suliffeqarfiit Canadameersut nunanik EU-mut ilaasortaasunik, avatangiisinik peqqissutsimilu illersuinermut malittarisassanik sukannernerusunik eqqusserusuttunik eqqartuussivilersuussinnginnissaat Vallonienimit ilaatigut qulakkeeqquneqarpoq.
Canadamut G7-mut ilaasortaasumut killilersugaanngitsumik niueqatigiinnissamik isumaqatigiissut assortuussutaasoq EU-mi siuttut ataatsimiinnerini ullumikkut atsioqatigiissutigineqartussaagaluarpoq.
Canadamili premierministeri Justin Trudeau isumaqatigiissut atsioriartorlugu ullumikkut Bruxellesiliassanersoq suli nalunarallarpoq.