Canadap aalajangersakkamik atsiornissaa naggueqatitsinnit nuannaarutigineqarpoq
Aalajangersagaq pingaarutilik taanna nunarsuatsinni naalagaaffiit amerlanersaasa atsioqataaffigereerpaat. Canadami naalakkersuisut siulii aalajangersagassap oqaasertaliorneqarneranut peqataapput, taamaattoq aalajangersakkap atuutilernissaanut atsiorusimanatik. Maanna naalakkersuisuusut siornatigut oqaatigereerpaat taamatut aalajangersagaqarnissaq pisariaqanngitsoq, tassami - nunap inoqqaavi pisinnaatitaaffeqareermata.
Canadami inatsisartuni ammaanersiorluni ippassaq oqalugiartoqarnerani nutaamik isummerneq saqqummiunneqarpoq.
Mary Simon Inuit Tapiriit Kanatami siulittaasuusoq oqarpoq, Canadami naalakkersuisut pilluaqquneqartariaqartut, tassa Naalagaaffiit Peqatigiit Nunap inoqqaavisa pisinnaatitaaffii pillugit aalajangersagaata atuuttussanngortinneqarnissaanut iliuuseqarniarlutik neriorsuimmata.
- Naalagaaffiit Peqatigiit aalajangersagaat tassaavoq ukiut 20-t sinnerlugit isumaqatigiinniarnerit inernerat, maannalu nunat tamalaat aalajangersagaat taanna Canadamit tapersersorneqalermat nuannaarutigisorujussuuarput, Mary Simon oqarpoq.
Taassuma ilanngullugu oqaatigaa naalakkersuisunit nunat issittormiut allat nunat killeqarfiinut tunngasunik aaqqiagiinngissutinut iliuuseqarnialernerat, Inuit Tapiriit Kanatamimit nuannaarutigineqartoq.
Tamatumunnga peqatigitillugu oqaatigaa, Canadap issittumut tunngasunik isumaqatigiinniarnerini tamani naggueqatigiit Inuit peqataatinneqartariaqartut.
- Naalakkersuisunut eqqaasitsissutigerusuppara, naggueqatigiit Inuit tassaammata Canadap issittortaani nunaqaqqaartut, naggueqativut aamma nunarput pillugit oqallittoqarnerani tamatigut peqataatinneqartariaqarpugut, Mary Simon naggasiivoq.
Naalagaaffiit Peqatigiit aalajangersagaat inuit pisinnaatitaaffiinut tunngasuuvoq, tassanilu tapersersorneqarlutik nunat inoqqaavisa pisinnaatitaaffii, namminersornermut, nunamik pisuussutaanillu oqartussaanermut, kulturimut, oqaatsinut, suliffissaqarnissamut, peqqissutsimut ilinniagaqarnermullu tunngasuni.
