Canadamut toqqaannartumik angalasinnaalissaatit
Sulinngiffiup nalaani angalanissat periarfissarpassuarnik ammaassivigineqarput, Air Greenlandip periarfissaq nutaaq Canadamut aqqut aasamut ammaasiviginialermagu.
Periarfissaq juunip 18-ianiit septembarip pingajuata tungaanut atuutissaaq. Ingerlalluassappat siunissaq ungasinnerusoq eqqarsaatigalugu piffissap timmisartuussiviusup sivitsornissaa siunertaavoq.
- Niuernikkut periarfissaasorisagut pingaarnerit tassaapput sullissassat Amerikap avannaaneersuunerusut uuliasiornermik aatsitassarsiornermillu inuussutissarsiutillit. Taamaammat angalanissanut pilersaarusiat Canadami ullormiit ullormut assersuutigalugu Ottawamut, Vancouverimut St. Johnsimut Goose Bayimullu ingerlaqqinnissamut periarfissat tunngavigalugit aaqqissuussaapput, Christian Keldsen Air Greenlandip niuernermi pisortaa oqarpoq.
Angalanissanut pilersaarusiornermi Canada tamakkiusallugu ullormiit ullormut ingerlaqqissinnaanissaq ataqatigiissaarneqarpoq, assersuutigalugulu nalunaaquttap akunneri arfinilingajaat atorlugit Nuummiit Ottawamut timmisartortoqarsinnaassaaq.
Nuummiit Iqalunnut timmisartuussinerit suluusalik DASH-8 34-inik ilaasoqarsinnaasoq atorlugu ingerlanneqassapput.
Nuummiit Iqalunnut timmisartorneq nalunaaquttap akunneranik ataatsimik minutsinillu 45-inik sivisussuseqassaaq siumuinnarlu 4.300 koruuninik akeqassangatinneqarluni.
