Canadamiut nunatsinni tunisisinnaanerat uumitsaatsigineqartoq

Johannes Egedep canadamiut qaleralinnik kilisaataat Nuup talittarfianiittoq takugamiuk uumitsassimavoq. Kilisaat assileriarlugu nittartakkakkut Facebookikkut ima allaaseraa:

-Canadamiut qaleralinnik qassusersorlutik pisaqamaarsuaartut nunarput aqqutigalugu avammut tunioraarsuaartut, nunatsinni uagut qaleralinnut qassusersoqqusaangitsugut. Kakkaak isigalugit nuanniikkami, naak tamakkutuulli uagut tulaassuisinnaagaluarluta, akilersinnaanngitsumik aalisartitaaginnaavilluta," Johannes Egede Facebookimi quppernermini taama allappoq.

Assimi takuneqarsinnaavoq kilisaat Sikuvut Nuup talittarfianniittoq.

Radioaviisilli Aalisarnermut, Piniarnermut Nunalerinermullu Naalakkersuisoqarfimmut tamanna pillugu saaffiginnimmat ima akissutissarsivoq:

- Canadamiut aalisariutaat nunatta imartaani aalisarneq ajorput, taamaammat Canadami inatsisit suli atuupput, immikkoortortaqarfimmi pisortaq Emanuel Rosing taama oqarpoq.

Umiarsuarsuit nunani allaneersut nunatsinni tunisagajuttarput, nunatsinni aalisakkat tuninerini akisunerusarmata. Taamaammat Canadamiut qaleralinnik kilisaataat Sikuvut Nuummiissimavoq. Canadami qaleralinnik qassusersorlutik aalisarsinnaapput, aalisarnerulli nakkutigineqarnera sakkortulluni.