Canadamiut Nanook aquppaat

Canadamiut sakkutuuisa issittumi sungiusartarnerat aasat tamaasa pisarpoq. Tassalu Canadap issittumi killeqarfiinik qulakkeerinninniarnerannut sungiusaataalluartarluni, issittumilu uuliarluertoqassangaluarpat timmisartorluunniit ajutuussagaluarpata Canadamiut sakkutuuisa qanoriliuusissatik nalornisiginnginniassammatigit taamatut sungiusartoqartarpoq.

Sungiusartuarsimanerallumi iluaqutaariikatappoq, Qausuittumimi Canadamiut sakkutooqarfiata ungasinngisaani timmisartoq siorna nakkarmat upalungaarsimaneq iluatsippoq, timmisartullu nakkartup issimasorpassuisa annaanneqarnerinik kinguneqarluni.

Aamma piffiit nutaat maanna atukkavut Canadamiut sakkutuuisa piareersimaffigivaat, issittumimi arlaatigut pinerliiniartoqassangaluarpat qanoriliuusissaaleqinngillat.

Canadamiut ukioq manna sungiusarnerat aatsaat taama annertutigaaq, sakkutuummi imarsiortut, nunasiortut timmisartortartullu 1.250-it ukioq manna sungiusaqataas, Canadap nunanut allanut ministeria Peter Mackay unnersiorpoq.

Ukioq manna sungiusarneq Canadap issittortaata kitaatungaani Inuuvimmi sakkutooqarfittaap ungasinngisaani ingerlanneqarneruvoq, Ualerngullu Tarajuani sungiusarnerup annersaa ingerlanneqarluni.

Qallunaat sakkutuui imarsiortut sungiusarnermi aamma peqataasussaapput, alapernaarsuummi Triton, Canadamiut sorsuuteeraat Saint Johns nunatta imartaani sungiusaqatigiittussaangaluarpaat, Saint Johnsili maskiinaajarmat sungiusaqatigiinnissaraluaq ilaannakuusumik ingerlanneqaleraluarluni. Saint Johnsilli maskiinaa Halifaximi iluarsaanneqareerpoq, tassalu sapaatiuppat maannga Nuummut tikilerluni.

Tamatuma kingorna Triton Saint Johnsilu sungiusaqatigiinnissartik pilersaarutit malillugit ingerlatissavaat.