Canadamiut ilisimatuui Qalasersuarmik piumasaqaateqarnissamut piareersartut

Ilisimatuut 23-t misissuinertik naammassigamikku Canadamiut sikusiutaanni Louis St Laurentimi nuannattunnguupput. Nunaviup toqqaviata atanera issittullu imartaa pillugu paasissutissanik ulluni 47-ni katersisimapput.

Aasaq manna misissuinerit saniatigut aamma aasani kingullerni marlunni misissuillutik sulisimapput.

Paasissutissarpassuarnik katersat nunaviup toqqaviata atanerata issittullu imartaata sutigut Canadamut atassuteqarnerinut uppernarsaatissatut atorneqassapput, taamaaliornikkullu imartani taakkunani uuliamik gassimillu pinngortitameersumik nassaassanik kikkut piginnittussaatitaanersut qulakkeerniarneqassalluni.

Aamma atuaruk Canadap Qalasersuarmut tunngatillugu piumasaqaatini tunniuppai

Paasissutissarpassuit ukiuni tullerni marlunni misissoqqissaarneqassapput, tamannalu naammassineqarpat imavissuarni inatsisitigut isumaqatigiissut naapertorlugu Naalagaaffiit Peqatigiinnut tunniunneqassapput, pisinnaatitaaffiillu taakkunannga nalilersuiffigineqassallutik.

Ilisimasassarsiornermi ilisimatuut qullersaasa ilaata Mary-Lynn Dicksonip CBC Newsimut oqaatigaa, paasissutissat nutaat atorlugit issittup imartaata 500.000-800.000 kvadratkilometeriata missaata Canadamit piginnittussaatitaaffigineqalerneranik kinguneqassasoq naatsorsuutigalugu.

Danmarkip Ruslandillu paasissutissanik katersatik Naalagaaffiit Peqatigiinnut tunniutereerpaat.

Naalagaaffiilli akornanni isumaqatigiinniarnerit suli naammasseqqangajanngillat, aamma Canada paasissutissaataatimik tunniussaqareerpat nunat pingasuusut akornanni isumaqatigiinniarnerpassuit ingerlanneqartussaassapput.

Aamma atuaruk Rusland Kristian Jensenimit itigartinneqarpoq