Canadami utoqqaat atornerlunneqartut

Canadap issittortaani utoqqaat ukiaanerani ataatsimoortinneqaqattaaleruttorput. Naggueqatigiimmi utoqqartaat utoqqaliartuinnartillugit suli ataqqineqartaraluaqaat, ukiorli manna utoqqarnik atornerluisarneq oqaluuserineqarnerulerluni.

Nunatsiavummi illoqarfiisa pingaarnersaanni Arfertuumi utoqqaat ukioq manna ataatsimeersuarmata pisarnermisut oqaatsit kulturitoqarlu oqaluuserineqarput. Ukiorli manna oqallinnermi utoqqaat atugarisaasa tujorminartuisa ilaat, tassa utoqqarnik atornerluisalersimaneq aamma eqqartorneqarmat.

Utoqqaammi ilaquttaminnit atornerlunneqartarneri takornartaajunnaariartuinnarpoq, tassami utoqqaat ilaqutaasa utoqqartatik aningaasaataanik arsaarinnittalersimapput, nerisarlutsitsinerusalersimallutik allaallu nerisassaannik isumaginnittarunnaarsimallutik. Ilannguakkuluimi oqaasipalaanik akerartugaasanngikkaangamik allaat unatarneqartalersimapput.

Tamatigullumi inuusuttuunerusut imigassamik ikiaroornartumilluunniit atornerluisuunerisa kingunerisaanik pissutsit tamakku atuutsilersimavaat, inuusuttuaraanerusullu utoqqarnik ataqqinnittussaatut perorsarneqanngitsoorsimasut utoqqarnut ajornartorsiutaasalersimallutik.

Utoqqaat atornerlunneqartarnerinik ajornartorsiut Arfertuumi kisimi ajornartorsiutaanngilaq. Nunavimmimi Kuujjuaraapimmi qaammat kingulleq utoqqaat ataatsimeersuartinneqarmata Inuktitut oqaatsit kulturitoqqallu pisarnermisut oqaluuserineqarnerisa saniatigut utoqqarnik atornerluisarnerit siullermeerutaasumik oqallisigineqarput.

Siornatigummi pissutsit taamaattut utoqqaat eqqartussallugit kanngugisarmagamikkit nipangiutiinnartarsimagaluarpaat, ukiarli manna utoqqaat ataatsimeersuartinneqarnerini pissutsit taamaattut kiisami oqaluuserineqartalerput, nipangiussisimaannarnerlumi iluaqutaanngisaannarmat oqallittoqalernera arlaatigut aaqqiisoqarnermik kinguneqarnissaa neriuutigiinnarsinnaavarput.