Canadami pisut ajornersaat katersugaasivimmi takutinneqalersut
Atuarfiit nerisaqarfiullutillu ineqarfiusut katersugaasiveqalernissamik pilersaarut maanna suliarineqarpoq, taanna Manitobami illoqarfimmit Winnipegimit 100 kilometerisut kippasitsigisumi inissisimavoq.
Katersugaasivik taanna naggueqatigiinnit inunnit, Metisinit aamma indianerinit kissaatigineqarpoq, atuarfiit angerlarsimaffiutigisut nalaanni pisut alinartorujussuit puigorneqarnissaat Canadamit kissaatigineqaraluartoq.
Canadami atuarfiit nerisaqarfiullutillu ineqarfiusut amerlanerit piaarneqareerput, qanga pisimasut alianartut puigorneqarniassammata. Ataaserli suli napavoq, taanna illoqarfimmi Portage la Prairiemi illorsuup Prince Rufusip ilaaniippoq.
Taanna katersugaasivittut sananeqassaaq. TV-qarfiup APTN-ip aallakaatitaani takutinneqarpoq naqqup-ilua isugutaqisoq, tassani meeqqat parnaarunneqartarput pinngitsaalillugillu kinguaassiuutigut atornerlullugit.
Naqqup-iluani tassani unngersat amermik sanaat arlaqarput, taakkua meeqqat pillarneqarneraangata atorneqartarput, meeqqat siniffinnut saviminernik sanaajusunut nerukitsunut innartinneqartarsimallutik.
Plainsimi indianerit høvdingiat H. Daniels nutaarsiassaqartitsivimmut, APTN Newsimut, oqarpoq, katersugaasivissap atulerneratigut Canadami innutaasut nutaanik paasitinneqarumaartut, atuarfinni nerisaqarfiullutillu ineqarfiusuni pisut ingasappallaartut pillugit, meerarpassuillu taakkunani naalliutsinneqarsimanerat pillugu eqqaasinneqartassagamik, Høvdingi H. Daniels oqarpoq.