Canadami nunap inoqqaavisa tarnimikkut peqqinnerulernissaat suliniutigineqalersoq
Naggueqatigiit Inuit eqqillillu inuusortaanni imminut toquttut amerlavallaarput. Minesteriunerup Trudeaup eqqillit inuusuttut 20-t najugaqarfimmi Nishnawbe Askimeersut sapaatit akunnerata ingerlanerani naapippai, inuusuttut akornanni imminut toqunnerup tarnikkullu napparsimanerup akiornissaannut Canadami naalakkersuisut 360 millionit koruuninik ukiunut tulliuttunut pingasunut immikkoortitseqqinniartut nalunaarutigalugu.
Inuulluartitsinissamut eqimattanik 43-nik, najugaqarfinni nunaqarfinniluunniit ajornartorsiortoqartillugu ingerlaannaq ikiuiartorsinnaasunut pilersitsisoqarnissamut aningaasat ilaatigut atorneqassapput.
Aamma imminut toqunnissamut navianartorsiortoqartillugu ikiuisinnaasussanut sungiusarfissat amerlanerusut pitsaanerusullu aallartinneqassapput.
Aamma Nunavummi ajornartorsiutilinnut ikiuisussanik sukkasuumik sumiiffinnukarsinnaasunik suleqatigiiliortoqassaaq.
Trudeaup aamma oqaatigaa, Naggueqatigiit Inuit qanimut suleqatigalugit imminut toqunnermut pinngitsoortitsiniarnermut periusissianik sulissuteqartoqarniartoq.
Taamaaliortoqarneralu naalagaaffiup Canadap naggueqatigiit Inunnut eqqillinullu atassuteqarnerunissaanut aallarniutaasoq, ministeriunerup Trudeaup naggasiutigaa.