Canadami nunap inoqqaavisa isiginnaartitsisarfiat siulleq pilersinneqartoq
Isiginnaartitsisarfittaap pisortaa Keving Loring Globe Mailimut oqarpoq Canadami nunap inoqqaavisa akornini tupinnaannartumik amerlasuunik eqqumiitsuliortoqarlunilu, isiginnaartitsisartoqarlunilu erinarsortartoqartoq.
Isiginnaartitsisarfiup ukioq naallugu ingerlasinnaanissaanut isiginnaartitsisartunik nunap inoqqavinik naammattunik pissaqalerpugut. Namminerlu oqaatsitik atussavaat. Isiginnaartitsissutit, qitinnerit nipilersornerillu nunap inoqqaavinit allagaallutillu saqqummiuinneqaput, Kevin Loring oqarpoq.
Isiginnaartitsisarfinni taamaattuni Canadami kisiartaavoq, ukiorpassuillu tamaviaarullugu sulissutigereerlugulu piviusunngorpoq.
Ukiumi isiginnaartitsiviusussami siullermi nunap inoqqaavisa arnartaat sammineqarput, nukittussusii, pinnissusii amma akiuussutissartaqarneri. Ukiumi isiginnaartitsiviusussami siullermi isiginnaartitsissutini aqqaniliusuni qulingiluat arnanit allanneqarput.
Oqaatsit piorsarsimassutserlu pillugit eqeersaaqqinniartut
Oqaatsit piorsarsimassutsillu eqeersaqqinneri canadamiunullu allanut ilisaritillugit siaruarneqarneri isiginnaartitsiviup suliassaasa aamma ilagaat. Isiginnaariartartut oqaatsit allat tusaassallugit sungiuttariaqarpaat, tassami operani tamakku sungiusimareerpaat, Kevin Loring isumaqarpoq.
Nunap inoqqaavi pingasut - tassa Inuit, Eqqillit aamma Métis-it tamarmik peqataatitaqarput.
Inuit ilaatinneqarluarput, tassa isiginnaagassianit aqqaniliusunit pingasut inunnut tunngasuummata.
Isiginnaartitsissutit nutaat marluupput, siulleq - Unikkaaqtuat - Inuit pinngortitsinermut oqaluttuatoqaannik tunngaveqarpoq.
Isiginnaartitsissutit aappaat - Kiinalik - arnat marluk kissaatigisaminnik piviusunngortitsiniarlutik Iqalunniit Kalaallit Nunaannut angalanerannik imaqarpoq. Isiginnaartitsissutip taassuma immikkoorutigaa Inuktituinnaannginnami aammali Kalaallisut aamma oqaasertaqarluni.
Ukioq isiginnaartitsiviusoq septembarimi aallartissaaq erinarsortartoq Inuk tusaamasaq Susan Aglukark inuttaralugu.
Isiginnaartitsissummi Kiinalimmi Laakkuluk Williamson Bathory peqataavoq, taanna affarmik kalaaliuvoq Canadamilu peroriartorluni.