Canadami naggueqatitta ilinniartitaanerat piorsarneqalerpoq
Naggueqatigiit Inuit ilinniartitaanikkut piorsaavigineqarnissaat pillugu Canadap avannarpasinnerusortaanut tunngassuteqartunut ministerip, Chuck Strahlip, naggueqatigiillu Inuit suliniaqatigiiffiata, Inuit Tapiriit Kanatamip siulittaasua Mary Simonip atsioqatigeereersullu ataatsimiititaliaq apriilimi pilersinneqarpoq.
Oqaatsit marluiit atorlugit ilinniartitaanermik pilersitsisoqarsinnaanersoq ataatsimiinnermi oqallisigineqassaaq, atuarsimasassat suunissaat, angajoqqaajusullu qanq iliornikkut iliuusissanut peqataatinneqarsinnaanissaat ilaatigut sammineqassallutik.
Nunavummi, Nunavimmi, Nunatsiavunni Inuvialunnilu ilinniartitseriaatsit sorliit iluatsissimanersut tunngavigalugit iliuusissat pilersikkiartuaartinneqassapput.
Naggueqatigiit Inuit allallu akornanni ilinniartitaanikkut assigiinngissutsit tammariartuaartinneqarnissaat anguniagaavoq, najoqqutassat ullutsinnut naleqquttut aamma atorniarneqassallutik.
Naggueqatigiit Inuit isumaginninnikkut atugaasa aningaasaqarniarnikkullu atugaasa pitsanngorsarneqassappata ilinniartitaanerit piorsaaviginieqartariaqartut, Inuit Tapiriit Kanatami sinnerlugu oqaaseqartartoq oqarpoq.
Canadami naggueqatigiit Inuit ilinniartitaanikkut piorsasavigineqarnissaannut atatillugu iliuusissat aappaagu septembarimi naammassineqarsinnaanissaat ilimagineqarpoq.