Canadami naggueqatigiit inuit Sisimiunut
Inuit nunami issittumi angalaarput nunami issittumi assigiinngissuseq misiginiarlugu aammalu inuit inuusuttut Canadameersut Kalaallit Nunaanneersullu naapinniarlugit.
Sapaatip ulloqeqqata siornagut Canadami naggueqatigiit inuit Sisimiuni takusassarsiortinneqassapput kingornatigullu Taseralimmi kulturit assigiinngitsut takutitsissutigineqassallutik. Tamatumani sisimiormiut Canadamiit tikeraanut ilaatigut qilaatersornermik, kalattoornermik, breakdancemillu takutitsissapput, Canadamiillu inuit nipilersornermik, torlussornermik qitimmillu takutitsissallutik.
Inuusuttut Nunavimmeersut utoqqaat peqatigalugit umiarsuarmut ilaasut inuusuttut pillugit suliassatut pilersaarummut ilaapput, tamatumani inuusuttut nunami issittumi assigiinngissutit misigissallugit aammalu inuit inuusuttut Canadameersut Kalaallit Nunaanneersullu naapissallugit. Ilaasut utoqqaanerit aammattaaq utoqqarnik sisimiormiunik naapitsinissaminnut periarfissaqassapput.
Ilaasut angalanertik namminneq akiligarinngilaat, umiarsuarlu ilaaffiat Nunavimmi inunnit pigineqarluni, siunertarineqarporlu issittup silarsuaata inuit isaannit isigalugu misigisaqarfiunissaa.
