Assi: Donna Lee/Flickr Creative Commons

Canadami naggueqatigiit Inuit assigiimmik allattaaseqalerusuttut

Canadami naggueqatigiit Inuit akornanni ilaatigut paaseqatigiissinnaaneq ajorput, sumiiffimmiit sumiiffimmut assigiinngitsumik allattaaseqarnertik pissutigalugu ilaatigut paaseqatigiissinnaaneq ajorlutik.

Canadami naggueqatigiit Inuit assigiinnerusumik allattaaseqarnissaat naggueqatigiit Inuit suliniaqatigiiffiata Inuit Tapiriit Kanatamip qaammatialunnguit matuma siornatigut suliniutigilerpaa, naqinnerit assersuutigalugu Nunatsinni ullumi atorneqartut assinginik allattaaseqaqqulerlugit.

Naqinnerit Canadami tamanut atuuttussat, oqaatsit pillugit Inuit Tapiriit Kanatami ataatsimiititaliap sapaatip-akunnerata siuliani ataatsimiinnermini aalajangerpaa, suliniaqatigiiffillu Ottawami sapaatip-akunnerata tulliani ataatsimeeqqissaaq, oqaatsit pillugit ataatsimiittoqaqqissalluni.

- Ataatsimut isigalugu tamatta immitsinnut paasisinnaavugut, paasinninnerilli aamma killeqarput, suliniaqatigiiffiup præsidentia Natan Obed atuagassiamut Maclean's Magazinemut oqarpoq.

Aamma atuaruk Canadami naggueqatigiit Inuit assigiimmik allattaaseqaleratarsinnaasut

Inuktitut sumiorpalussutsit assigiinngitsorujussuupput, inuiaqatigiit avinngarusimanerusuni najugallit oqaasii ilaatigut allaanerusarlutik, allattaasiallumi aamma assigiinngittaqalutik.

Tamanna pissutaalluni Canadami naggueqatigiit Inuit akornanni attaveqaqatigiittarneq ilaatigut ajornakusoorsinnaasarpoq.

Oqaatsilli assigiiaarnerulersinneqarpata, naqinnerillu tamanut atuuttussat atuleraanni pitsaanerusumik attaveqaqatigiittoqalersinnaassagaluartoq Natan Obedip oqaatigaa, assersuutigalugu oqaatsit ilinniartitaanermi atorneqartussat pilersinneqarsinnaalissallutik, Obed oqarpoq.

Inuit Tapiriit Kanatamip oqaatsit pillugit ataatsimiititaliaata Canadami naggueqatigiit Inuit oqaasii pillugit innersuutissai upernaaru saqqummiunneqarnissaat naatsorsuutigineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat