Canadami naggueqatigiit Inuit assigiimmik allattaaseqaleratarsinnaasut
Inuit Nunatsiavummeersut, inuillu Issittup kippasinnerusortaaniittut Inuvialuit allattaatsimik Nunatsinni atorneqartumut assingusumik atugaqarput, Nunavummili Nunavimmilu Inuktitut allattasitoqqat syllabicsimik taaguutillit suli atorneqarlutik.
Nunap immikkoortui sisamat taakku akornanni attaveqaqatigiinniarnerit taamaammat ajornakusoorsinnaasarpoq, soorlu aamma Kalaallit Nunaannut Alaskamullu attaveqarniarnerit ajornakusoorsinnaasartut. Naggueqatigiilli Inuit ataasiusumik allattaaseqalersinnaanissaat ukiorpaalunngulersuni oqallisigineqarnikuuvoq.
Ukialunni sulissutigineqartoq
Taamanikkut Naalakkersuisut siulittaasuata Jonathan Motzfeldtip ukiut 20-t matuma siornatigut oqalugiarmat oqaatigaa naggueqatigiit Inuit oqaasii ataasiusumik allattaaseqartariaqaraluartut. Tassa qangali tamanna oqaluuserineqalerpoq, sulilu tassa piviusunngorsimanani.
Suleqatigiissitaliat Atausiq Inuktitut Titirausiq ajornartorsiutip aaqqiivigineqarnissaa pillugu ukiualunni maanna sulereerput, nunaqarfinni illoqarfinnillu assigiinngitsuni tusarniaasarsimallutik.
Suleqatigiissitaliat inerneri Iqalunni sapaatip-akunnerata tulliani ataatsimiinnissaanni saqqummiunneqarumaarput, naggueqatigiit Inuit suliniaqatigiiffii assigiinngitsut aggersarneqarsimapput, soorlu aamma nunap immikkoortuisa naalakkersuinikkut siuttui assigiinngitsut qaaqqusaasimasut.