Canadami kostskolit nuanniigineqaqisut pillugit filmi nutaaq
Filmi Indian Horse, indianerit hiistiat, nunap immikkoortuani Ontariomi piffissami 1959-imit 1980-imut pisimasuutinneqarpoq. Ojibway-indianerineersoq inuusuttoq ilaquttaminit pinngitsaaliissummik arsaagaavoq atuarfimmullu nerisaqarfiutigaluni najugaqarfiusumut, mattuttunit arnanit katuullillu palasiinit aqunneqartumut aallartitaalluni. Taamatut pisoqarsimaneranut assersuutissat amerlasuupilussuupput Canadallu oqaluttuarisaanerni immikkoortut taarnerpaat ilagalugu.
Indianeri inuusuttoq Saul taassumalu inuunerata oqaluttuassartaa filmimi sammineqarpoq atuarfimmilu nerisaqarfiutigaluni najugaqarfiusumi pisut ingasattupilussuit, hockeyimik unammisartutut neriunaatilittut ingerlasimanera tamatumanilu immikkoortitaanermik misigisaqaqqinnera kingornalu atuarfimmi nerisaqarfiutigalugu najugaqarfiusumi atukkami kingunerisaannik inuunerminut aserorsaataasumik ingerlalernera oqaluttuarineqarput.
Filmi Ojibway-indianerip Richard Wagamesep atuakkiaa, aamma taamatut qulequtaqartoq, tunngavigalugu suliarineqarpoq. Filmip annerpaataani Ojibwayit oqaasii atorneqarput.
Filmimi ilitsersuisup filmip ilaa isiginnaartitsisartumut tusaamasarsuarmut Clint Eastwoodimut takutissimavaa, taannalu oqarsimavoq Canadami taama pisoqarsimanavianngitsoq, canadamiut taamaattuunngimmata. Filmimilu oqaluttuarineqartut ima aalassaatigitigaa filmip suliarineqarneranut qullersatut imminut neqeroorutigaluni aammalu siuarsarneqarnissaa peqataaffigisimallugu.
Indian Horse sapaatit akunneranni uani takuteqqaarneqarpoq, filminillu naliliisartoq naapertorlugu, filmiuvoq takusariaqagarput.
Atuarfippassuit nerisaqarfiutigalutik najugaqarfiusut Inunnik, indianerinik Métisinillu naalliutitsisimasut Ilumoortussaq Saammaateqatigiinnissarlu pillugit isumalioqatigiissitamit aamma oqaluttuarineqarput. Tamakkulu filmimi pineqartumi oqaluttuarineqarput immaqalu paasinninnissamut saammaateqatigiinnissamullu pisariaqartumut aqqutissiueqataasinnaassallutik.
