Canadami kiarujussuarnera qaangiukkiartorpoq - pinngortitamili suli ikuallattoqarpoq
Canadap kippasissortaani kiannersuaqarnera qaangiukkiartorpoq. Panernersuarli siammasissoq suli kiarujussuartitsivoq pinngortitamilu arlalinnik ikuallatitsilluni.
Panernersuaqarfiusumi British Columbiamiinnaq pinngortitami ikuallannerit 136-it nalunaarsorneqarput.
Kiassuseq sumiiffimmi tassani sapaatit akunnerisa siuliani uuttortarneqarami 50 Celsius gradingajannik kiappoq. Maannali malugineqarsinnaasumik kiassusaa apparpoq.
AAMMA ATUARUK Canada aatsaat taama kiatsigeqqittoq
Illoqarfeeraq Lytton 1000-it missaanni inulik ikuallarujussuartoqarnerani sapaatit akunnerani matumani ilisarnarunnaavingajassimavoq. Ikuallattoqarneralu inuit marluk inuunerannik akeqarpoq.
Hunnorujulikkaat qimagutsinneqartut
Lytton Vancouverimit 250 kilometerinit avannarpasinneruvoq. BBC-lu naapertorlugu illoqarfeeqqami najugaqarfiit 90 procentii minutsit 15-it iluani ikuallammit siaruaaffigineqarput.
Sumiiffimmi ikuallaffiusumiittut inuit hunnorujulikkaat qimagussuunneqarput.
AAMMA ATUARUK Canadami oqaluffimmik ikuallaasoqaqqillunilu aserorterisoqaqqittoq
Kiarujussuarnera hunnorujulikkaat ilimaginngisamik toqunerannik nassataqarpoq - tassani utoqqaat eqqorneqarnerupput.
Orpippassuarni ikuallannerit amerlanersaat kallerup innaallattarneranit ikuallalerput.
Naqitsinertuffik peqqutaasoq
British Columbiamiinnaq kiarujussuarnera ulluni kingullerni misigineqanngilaq.
Albertami, Saskatchewanimi Manitobamilu aamma kiarujussuarpoq. Aamma amerikkami naalagaaffinni Oregonimi Washingtonimilu aatsaat taamak kiatsigaaq, ullummi arlallit atatiinnarlugit kiassiut 47 gradit qaangerlugit uuttuivoq.
USAp avannaata kitaani Canadallu kujataata kitaani kiassutsip qaffannera naqitsinertuffimmik peqquteqarpoq. Taannami naqitsinertuffik qaarajunnertut ilusilimmik kissartumik silaannalimmik pilersitsimmat.
