Canada aatsaat taama kiatsigeqqittoq

Canadami nunap immikkoortuani British Columabiami illoqarfimmi Lyttonimi 46,6 gradinik kiattoq, British Columbiami oqartussat sapaatiummat uuttortarpaat. Canadap oqaluttuarisaanerani aatsaat taama kiatsigaluni.

BBC ataasinngornermi unnukkut taama allappoq.

Canadami illoqarfinni Yellow Grassimi Midalemilu 1937-imi 45 gradinik kiatsiginera uuttortarneqarmalli aatsaat taama kiatsigaaq.

Canadap kippasissortaani, USA-llu avannamut kippasissortaani ulluni makkunani kiangaatsiarpoq, kiannerujussuatalu sapaatit-akunnerata tulliuttup ingerlanerani ulorianarsinnaanera USA-mi Canadamilu oqartussat mianersoqqussutigaat.

AAMMA ATUARUK USAmi inuttaasut inersuarnut nillataatunukarsinnaanissaat ammaassiffigineqartoq

Amerikap avannarliup nunavittaata kitaani Pacific Northwestip nalaani naqitsinertuffiit pissutaallutik ulluni makkunani kiangaatsiartoq, USA-mi silasiorfiup National Weather Servicep nalunaarutigaa.

Canadami British Columbiami sumiiffinni 40-ni sapaatit-akunnerata naanerani aatsaat taama kiatsigineranik nalunaarsuisoqarpoq.