Canadami Inuit ilinniartitaaneranni suliassat annertuupilussuupput
Naggueqatigiit Inuit siuttuat nuimasoq, siornatigullu Canadap Issittumi aallartitarisimasaa Inuillu suliniaqatigiiffiata Inuit Tapiriit Kanatamip siulittaasorisimasaa, Mary Simon, suliassaq taanna naammassiniarlugu ilungersuuteqarniarluni aalajangersimavoq, tassalu atuartitaaneq qaffassarneqassasoq, Inuit pitsaanerusumik ilinniagaqalernissaat taamaaliornikkullu Issittumi aningaasarsiornikkut ineriartortitsinermut maanna ingerlanneqartumut tamakkiisumik peqataasinnaaleqqullugit.
Tamannalu tunngavigalugu nuna tamakkerlugu ataatsimiititaliaq, The National Committee on Inuit Education, pilersippaa, naggueqatigiit Inuit ilinniartitaanikkut qaffassaavigineqarnissaannik suliaqartussaq. Ataatsimiititaliaq Inuit siuttuinit aammalu inuussutissarsiornermi siuttunit atuarfeqarnerullu iluani siuttunit ilaasortaaffigineqarpoq.
Radioaviisimit apersorneqarluni oqaatigaa, Inuit pitsaasumik ilinniagalernissaannut ajornartorsiutit annertuupilussuit akornutaasut.
Ajornartorsiutit ilaattut taavai kostskoleni piffissap ingerlanerani pisarsimasut tujortuminartut kingunerlutsitsisarsimasullu pissutigalugit angajoqqaarpassuit atuarfeqarneq tatiginartikkunnaarsimagaat, aammalu Issittumi nunap immikkoortuini atuarfiit atuartitsisunik pikkorissunik pissarsiniarnikkut taakkulu pigiinnarnissaannut ajornartorsiuteqarmata.
Ajornartorsiutit annertuut ilagaat aamma atuartut atuarnissartik eqiagimmassuk, tamannalu angajoqqaanit iliuuseqarfigineqarneq-ajormat, ajornartorsiullu taanna Mary Simonip eqqumaffiginiartupilussuuaa. Angajoqqaallu meeqqamik tamatigut atuariartortittarnissaannut kaammattorpai, nalinginnaasumillu meeqqamik atuartitaanerat soqutigineruleqqullugu. Angajoqqaammi meeqqat atuartitaanissaannut pingaaruteqarnerpaasutut isigivai.
Mary Simonip periaasissatut malitsinniagaani, Inuit meerartaat inuusuttaallu ilinniartitaassapput, aningaasarsiornikkut ineriartortitsinerup malitsigisaanik suliffippassuarnik pilersinneqartussanik tigusinissaannut piareersarlugit, suliffiit taakku nunap kujataaneersunit inuttalersuinnarnagit.
