Canadami aatsitassarsiorneq ineriartupiloortussanngorpoq

Quebecip avannaani aatsitassarsiornerup ineriartortinnerani ukioq 2012 pingaartuussasoq, Quebecimi ministeriunerup, Jean Charestip, siusinaarluni ukiortaamut apersorneqarnerani oqarpoq.

Naalakkersuisui Quebecip avannaanut nutaamik annertuumik upernaaq pilersaarusiorput. Pilersaarut Avannaanut Pilersaarummik taaneqartoq, namminersortunit aningaasaliisunik, nunanit aasiameersuniinerusoq, 400 milliardit koruunit sinnerlugit ussagartissagaat ilimagineqarpoq. Aatsitassarsiorfinni nutaani savimmineq, nikkeli, urani, kuulti aligoqqit aatsitassallu allat piiarneqassapput. Aatsitassarsiorfissani amerlasuuni Kina peqataalereerpoq.

Quebecip nammineerluni ataqatigiinnermut attaveqarfiit pisariaqartut sanaartoreersimavai, akikitsumillu naammattumillu erngup nukinganik peqarlutik.

Quebecip avannaa tamarmik pilersaarummut ilaavoq, nuna Frankrigip marloriaataatut annertutigisut, tassungalu aamma Nunavik ilaavoq.

Jean Charest sapaatit akunneri tullii atorlugit Quebecip avannaani angalaarniarpoq innuttaasut tamaani najugaqartut aatsitassarsiornerup aningaasaqarnikkut qajannaatsumik aalaakkaasumillu siunissaqarnissaanik killinniarlugit, siunissarli innuttaasut sungiusimasaanit allaaneq.

Aatsitassarsiornermi pilersaarutit nutaat pillugit ataatsimeersuarneq nunat inoqqaavinit naalakkersuisunit suliffissuaqarfinniillu aallartitanit peqataaffigineqartoq siulleq Montrealimi sapaatip akunnera kingulleq ingerlanneqarpoq. Ataatsimeersuarnerit ukiup tullianut ingerlanneqartassapput, pilersaarutimmi amerlasuut aningaasallu amerlasuut nunami annertoqisumi nutaamik siunissaqalernissamut pisariaqartinneqarput.

---
Marianne Stenbækip ilanngutassiaa Tikaajaat Kristensenimit kalaallisuut suliarineqarpoq.