Canadami 51-inik ukiulik politiitut atikkersorsimasoq aallaasersortoq
![](/sites/default/files/styles/image_934x467/public/article_images/20200420-072752-l-1920x1279we.jpg?itok=gUeuAgqM)
Canadap ilaani, Nova Scotiami angutip 51-inik ukiullip politiitut ilaatigut atisalersorsimasup inuit ikinnerpaamik 16-it aallaallugit sapaammi unnuakkut inuartarai.
Canadap naalagaaffiani politiit, RCMP, taama nalunaaruteqarput.
Sinerissap qanittuani Portapiquemi aallaasersortoqarpoq.
Aallaasersortutut pasineqartoq toqusoq
Aallaasersortoq biilinik ingerlaarsimavoq, biilillu politiit biiliinut assingusumik qalipanneqarsimallutik.
Aallaasersorneq arfininngornermi unnukkut aallartippoq nalunaaquttallu akunneri aqqaneq-marluk missaannik sivisutigisimalluni.
Canadami aallaasersortoqarnerani inuit 16-it toqutaammata piffinni nutaajunerusuni aatsaat taama sakkortutigisumik pisoqarpoq. 1989-imi kingullermik taama sakkortutigisumik pisoqarmat Montrealimi arnat 15-it toqutaapput.
Politiit aallaasersortutut pasineqartoq orsersortarfimmi sapaammi ullaakkut unitsippaat. Angut taanna toquvoq, politiilli tv-eqarfimut CTV-mut uppernarsaarumanngillat angut qanoq ililluni toqusimanersoq.