Canada WTO-mut ikioqqulerpoq
EU-p puisit amiinik tunisassianik inerteqquteqarnera atorunnaarsinniarlugu Canadami naalakkersuisut, nunat tamalaat niueqatigiinnikkut suleqatigiiffiannut 2009-mili ikioqqullutik saaffiginnittaraluarput. Tamannali qisuariarfigineqarneq ajormat, Canadami naalakkersuisut suleqatigiiffimmut qinnutigaat, Canadap EU-llu isumaqatigiinngissutaanut, pisortatigoortumik isumaqatigiissitsiniartussanik pilersitseqqullugu.
Canadap issittortaani niuernermut ministeri, John Duncan tusagassiuutinut nalunaarummini allappoq, Canadap niueqatigiinnikkut suleqatigiiffimmut pisortatigoortumik saaffiginnissutaa, naggueqatigiinnut Inunnut pingaarutilerujussuusoq, tassami naggueqatigiit Inuit nunaqarfinni avinngarusimasuni nunaqartut, aningaasarsiornissamut killilimmik periarfissaqartut, puisit amiinik tunisassiaminnik tunisisinnaanissaaat pingaaruteqarluinnarmat.
- Taamatut suliniuteqarnitsigut neriuutigaara, EU-p pisariaqanngitsumik naapertuilluanngitsumillu inerteqquteqarnera aaqqiivigineqarsinnaassasoq, John Duncan taama oqarpoq.
Canadami aalisarnermut ministeri Gail Shea oqarpoq, Canadami puisinniarneq illersorniarneqartoq aamma piniartut tuusintilikkaat Canadap avannaani kangianilu puisinik inuussutissarsiutillit tamakkiisumik tapersersorneqartut.
Canadami peqqissutsimut ministeri aamma nunap issittortaanut ministerip Leona Aglukkap aamma erseqqissarpaa, EU-p puisit amiinik inerteqquteqarnermini, puisit amiinik naggueqatigiinnit Inunneersunik inerteqquteqannginnera annerusumik sunniuteqarsimanngitsoq, tassami EU-p inerteqquteqarnera pissutigalugu puisit amiinik tunisassiat inerteqqutaanngikkaluartulluunniit, Europami pisisartunut tuniniarnerat ajornakusooqimmat.
- Taamaattumik naalakkersuisut taama suliniuteqalernerat nuannaarutigaara, tassami naggueqatigiit Inuit nungusaataanngitsumik pisarnertik malillugu puisinniartarnerat illersorlugu suliniarnerummat, Leona Aglukkaq oqarpoq, Marianne Stenbæk taama tusagassaqartitsivoq.
