Canada siullersaalluni meeqqat Pfizerimit akiuussuserneqarnissaanut akuersisut
Canada nunarsuarmi nunani siullersaalluni nakorsaasiorfiit Pfizer/BioNTechillu coronavirusimut akiuussutissaliaata meeqqanut aqqaneq-marluleereersunut atorneqarsinnaanissaa akuersissutigaa.
Canadap naalakkersuisuisa peqqissutsimut siunnersortaat Supriya Sharma taama ilisimatitsivoq.
Akiuussutissap inersimasunut atorneqarneratut meeqqanut atorneqarnera isumannaatsuuneranik takussutissaqartoq Sharma oqarpoq.
- Akiuussutissaq una meeqqat coronavirisumik tunillanneqarsinnaanerannik pinngitsoortitsisinnaasut akornanni Canadap nappaammik siaruatsaaliuinerani atorneqartut siullersaraat, peqqissutsimut siunnersortit, tusagassiortunik katersortitsinermi taama oqarput.
AAMMA ATUARUK Naggueqatigiit inuit Canadami akiuussutissamik kapitinnissamut salliutinneqassasut
Pfizer/BioNTechip akiuussutissaliaa EU-mi meeqqanut aqqaneq-marluk 15-illu akornanni ukiulinnut atorneqarsinnaanissaa pillugu aamma qinnuteqaateqarpoq.
Europami nakorsaatinut aqutsisoqarfiata, EMA-p, EU-mi akiuussutissanik akuersissuteqarsinnaanermut qinnuteqaatit suliarisarpai.
Nakorsaasiorfiit Pfizer/BioNTech, nunarsuarmi nakorsaasiorfiit akornanni siullersaallutik coronavirusimut akiuussutissamik inersimasunut atorneqarsinnaasumik EU-mi siorna decembarimi akuersissuteqarfigineqarput.