Canada ernummatissaqanngilaq
Nunat tamalaat issittumi pissutsit pillugit Canadami Edmontonimi ataatsimeersuarneranni Mininnguaq Kleist taama oqaaseqarpoq.
- Mexicop Kangerliumanersuani pisut ernumanartoqartillugit malinnaaffigeqqissaarpavut, taamaattorli erseqqissarusupparput Nunatta imartaani uuliamik ujaasilluni qillerinerni, isumannaatsuunissamut piumasaqaatit, soorlu Norgip avataani qillerinerni atuuttut aamma matumani atuuttussaammata. Taakkulu nunarsuatsinni sillimanissamut piumasaqaatit sakkortunersaraat, Mininnguaq Kleist aviisimut oqarpoq.
- Aamma uagut ernummateqarpugut. Uuliamik mingutsitsinikkut pinngortitaq inuuffigisarput aserorneqarsinnaasoq paasilluareerparput. Taamattumik Issittumi aatsitassarsiornerit uuliamillu ujaasinerit tamarmik nakkutigeqqissaarneqassapput, aamma tamakkua Canadamiluunniit ingerlanneqaraluarpata, Mininnguaq Kleist oqarpoq.
Craig Stewartillumi avatangiisinik illersuiniatigiiffimmi WWF-imeersup nassuerutigaa, Kalaallit Nunaat qillerinissanut isumannaatsuunissamik, soorlu Canadamit sakkortunerujussuarnik piumasaqaateqarmat.
Taassuma tikkuarpaa, Kalaallit Nunaanni uuliasiornermi isumannaatsuunissaq pillugu tamanit pissarsiarineqarsinnaasunik nalunaarusiaqarmat, Canadamili uuliasiorluni qillerinissanut tunngasut, naalakkersuisut uuliasiortitseqatigiiffiillu akornanni matut matoqqasut tunuanni isumaqatigiissutigineqartarlutik.
- Maani Canadami uuliasiortitseqatigiit qillerinissartik qanoq ingerlatissanerlugu namminneerlutik aalajangersortarpaat, Craig Stewart Canadian Pressimut oqarpoq, Canadamilu uuliasiorneq pillugu oqallittoqarnerunissaa ujartorlugu.
