Campus Kujallermi ilinniarfik nutaaq

Ilinniartut siulliit 24-t Ilulissani Adventure Guidetut maanna aallartissimalerput. Ilinniarneq ukiup affaanik sivisussusilik Campus Kujallermi Qaqortumiittumi decembarip qaammataani naammassineqassaaq.
Adventure Guidetut ilinniartut siulliit ilinniartitsisuilu Assi © : Campus Kujalleq
Allattoq Bibi Nathansen
aggustip 13-at 2016 15:14

Campus Kujallermi ilinniartitaanerit pillugit kiffartuussivimmi immikkoortortami pisortaq, Rie Oldenburg tusagassiuutinut nalunaarummi allappoq.
 
2013-imili issittumi takornarianik angallassisartunngorniatut Campus Kujallermi ilinniartoqarsinnaalerpoq, atuarfillu naapertorlugu ilinniarneq taanna iluatsilluarsimavoq, maannalu Adventure Guideningimik taanneqartumik Campus Kujallermi ilinniartoqalersinnaalerpoq.

Islandimi ilinniarnerit isumassarsiffigalugillu malillugit, nunatsinnilu takornariaqarnermi suliniuteqartut assigiinngitsut suleqatigalugit ilinniarneq nutaaq pilersinneqarpoq.

Ilinniartut ilaatigut nunatta naasui uumasuilu pillugit, kiisalu nunatta geologiia pillugu ilinniartinneqassapput.

Ilinniarnerup nalaani ilinniagassat silami ingerlanneqartussat Ilulissani ingerlanneqassapput, kingornali ilinniartut Qaqortumi Campus Kujallermi ilinniarnertik nangissavaat.

Ilinniarneq inunnut pinngortitamik nuannarisaqartunut, illoqarfiullu eqqaani takornariartitserusuttunut naleqquppoq. 

 

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq