Camp Centurymi pisimasut IAEA-mut nalunaarutigineqarnissaat piumasarineqarpoq
Sakkunik atomitortunik siammaasoqannginnissaa pillugu FN-imi isumaqatigiissutigineqarsimasumut ilassutissaq Danmarkip qangali nangaassutigereerlugu ukioq manna marsimi atsioreeraalu, Camp Century pillugu paasissutissat sammineqaqqilerput. Tassa paasissutissanik FN-imut pinngitsoorani saqqummiussinissaq matumani pineqarpoq, Nunarpullu Danmarki aqqutigalugu peqataalluni.
Atomip nukinganik atuiffiusunik toqqorsivinnillu, aamma Nunatsinniittoqassappat, FN Nunatsinni taamaasilluni nakkutilliiartorsinnaanngorpoq. Atomilli nukinganit pisunik Nunatsinni atuisimanermik takussutissaqanngitsoq, Danmarkip FN-imut nalunaarutigeqqammerpaa.
Camp Centurymik taallugu Pituffimmiit kangimut 220 kilometerisut ungasitsigisumiissimasumik atomimik nukiliorfeqartoqarsimanera Danmarkimit taamaasilluni nalunaarutigineqanngilaq.
Siornatigummi taamaattoqarsimanera, Nunat tamalaat atomip nukinganik atuinermik nakkutilliisoqarfiannut, IAEA-mut, nalunaarutigineqartariaqanngitsoq, Danmarkip nunanut allanut tunngasunut ministereqarfiata nalilersimavaa.
Erngup qinngornernik ulorianartunik akullip Camp Centurymit maanngaannartinneqarsimasinnaanissaa, Siumut sinnerlugu Folketingimut ilaasortap Doris Jakobsenip ernummatigaa.
Sermersuarmi atomimik nukiliorfiusimasumi pisimasut IAEA-p nakkutilliisarneranut nunanut allanut tunngasunut ministerimit Villy Søvndalimit taamaammat ilaatinneqarlutillu suliniutigineqarnissaat, Doris Jakobsenip piumasaraa:
- Namminersorlutimmi Oqartussat ataanni maanna inissisimasut FN-ip nakkutilliisarneranut ilaatinneqartussaannginnerat pissusissamisuunngilaq, naak USA-p sakkutuuinit siornatigut atorneqarnikuugaluartut, Doris Jakobsen, Nordjyske Stiftstidendemut oqarpoq.
Atomimik nukiliorfik Camp Century, Sorsunnerup Nillertup nalaani sananeqarpoq. Sermersuarmit qallerneqarsimasumik illoqarfiliortoqarnissaa eqqarsaataasimagaluarpoq, sullulianik ulikkaarluni, raketit igeriuttakkat taamanikkut Sovjetunioniusimasumit takuneqaratik nuunneqarsinnaanissaat siunertaalluni. Sermersuulli uninnganani ingerlaartarnera pissutaalluni pilersaarutit taamaatiinnarneqarput.
Filmi naatsuliaq "The City Under The Ice", qarasaasiaq atorlugu takuneqarsinnaavoq, Youtube-ikkut takuneqarsinnaalluni. Atomimik nukiliorfik atorneqartoq tassani takuneqarsinnaavoq.
Sakkutooqarfinnilli allanik peqartoqarsimanersoq maanna apeqqutaalerpoq, Kalaallit Nunaata ilisimanngisaanik peqarsimanersoq apeqqutaalerluni:
- Atomip nukinganik atuilluni Nunatsinni nukissiortoqarsimanera pillugu paasissutissanik annertunerusunik nassuiaateqartoqarnissaa neriuutigaara, nunat tamalaat nakkutilliisarnerannut tamanna iluaqutaasinnaassammat, folketingimut ilaasortaq Doris Jakobsen, Nordjyske Stiftstidendemut oqarpoq.
