Cairn qillerinissaminut akueritingajalerunarpoq
Ove Karl Berthelsenip Naalakkersuisunut innersuussutigaa, uuliasioqatigiiffik Cairn Energy pilersaarutigineqartutut Qeqertarsuup Diskop kitaani misiliilluni aasaru qillerinissamut akuerineqassasoq.
- Naalakkersuisut akuersaarlunga nalunaarfigereerpakka, innersuussutigalugulu isumannaatsuunissamut piumasaqaatit sakkortuut tunngavigalugit, pilersaarutit Naalakkersuisut akuerissagaat, Ove Karl Berthelsen oqarpoq.
Naalakkersuisut maanna sapaatip akunnerata tulliani akissuteqannginnerminni, mappit pingasut atuaqqaassavaat. Ove Karl Berthelsenilli innersuussutaa pingaaruteqarpoq.
Issittumi siunnersuisoqatigiit Ilulissani ataatsimiinneranni, Canadami avatangiisinut ministerip Jim Prenticep Ove Karl Berthelsen aamma nunami namminermi pissutsinut naalakkersuisoq Anthon Frederiksen ataatsimeeqatigai, tassanilu oqaatigalugu Kitaata avataani misiliilluni qillerinissanut ernumajunnaarluni. Siusinnerusukkut misileraalluni qillerinissanut ernummateqarnini oqaatigigaluarpaa.
- Isumannaatsuunissamut piumasaqaativut sakkortuut Canadamiut nalusimagaluarpaat. Canadamiut New Foundlandip avataani qillerinernut piumasaqaataannit isumannaatsuunissamut sakkortunerusunik piumasaqarpugut. Taamaattumik isumannaatsuunissamut piumasaqaatinik sakkortunerpaanik Canadamiullu siunissami suleqatigiinniarluta isumaqatigiissutigaarput, Ove Karl Berthelsen oqarpoq.
Berlingske Tidendemi allaaserisaq naapertorlugu Cairn-ip umiarsuai marluk attartukkat, tassalu umiarsuaq misissuinermut atortoq 'Nordica' umiarsuarlu pilersuinermut atortoq 'Vidar Viking' Baffinip kangerliumarnganut, pilersaarutit malillugit qilleriffiusussanut, apuutereersimapput.
Umiarsuit attartukkat 'Stena Forth' aamma 'Stena Don' umiarsuillu allat pilersuinermut ikiorsiinermullu atortut Kalaallit Nunaannut ingerlaarput.
