Cairn milliardinit amerlanerusut uuliaqannginneq pissutigalugu annaavaa
Taamatut appariarnerat ullormi ataasiinnarmi pivoq, tassa uuliasiortitseqatigiiffik aningaasaliisunit piginneqataassutinillu misissueqqissaartartunit sakkortuumik pillarneqarluni.
Aviisimi The Herald Scotlandimi taama allaaserinnittoqarpoq.
Aningaasat taakku Cairn Energyp ukiormanna Nunatsinni uuliamik ujaasilluni qillerinermini atugassaasa affai qaangerlugit amerlassuseqarput. Tassami ukiormanna qillerinissamut atugassat 3,5 milliardit koruuniupput, appariaataallu tassa 2 milliardit koruunit sinneqarluni.
Cairn Energyp piginneqataassutai, uuliamik ujaasilluni qillerinerni maannamut iluatsitsiffiunngitsuni eqquinerluffiupput. Piginneqataassutit nalingi qaammammi kingullermi 13 procentimik appariarput, qaammatinilu 18-ini aatsaat taama appasitsigilerlutik.
Cairn Energyp qillerinerminni uuliamik nassaannginnerminnik nalunaaruteqarnerminnut atatillugu, Nunatta imartaani uuliamik nassaarsinnaanissaminnik suli neriulluarput.
Uuliasiortitseqatigiiffiup aningaasanik allamit isaatitsinissani immaqa aamma qulakkeereersimavaa. Tassami qaammammi matumani kingusinnerusukkut Cairn Energyp Immap Akullersuup kangisinnerusortaani uuliamik ujaasilluni qillerilernini nalunaarutigisussaavaa. Nittartakkami Bloomberg.com-imi taama allaaserinnittoqarpoq, taamaattorli uuliamik ujaasinissamut nutaamut tunngasut Cairn Energyp annerusumik paasissutissiissutiginngilai.