Cairn immami itinerusumi qillerilisinnaalerpoq

Cairn Energyp qillereqqinnissaminut qinnuteqaataa ullaaq manna Naalakkersuisut akuersissutigaat.

Qillerinerit siulliit immap naqqaniit ammut 300 meterimiit 400 meterit tungaanut ititigisumiipput, qillerinissallu nutaat marluk 300 meterimiit 600 meterip tungaanut immap naqqaniit ititigisumiissallutik.

Avatangiisinik illersuiniaqatigiiffiup Greenpeacep naliliinera malillugu Cairn Energy siullermik qillerigami itivallaami qillerivoq.

Cairn Energyp qillerinissai tulliit 200 meterisut itinerusumiikkaluartut, Aatsitassanut Naalakkersuisup, Ove Karl Berthelsenip isornartorsiutit tunngavissaqannginnerarpai:

- Nunat tamat aalajangersagaanni aammalu Norgep pilersitaani allassimavoq immami 650 meteri tikillugu ititigisumi qillerisoqarsinnaasoq. Taamaattumik uagut qillerititsinitsinni tamanna ataallugu qillerivugut.

Avatangiisinik illersuiniaqatigiiffiup Greenpeacep umiarsuaa Esperanza, maanna Kalaallit Nunaata imartaaniittoq ilimagineqarpoq. Umiarsuup siunertaraa nunani issittuni uuliasiornermi nunat issittut navianartorsiortinneqarnerat kikkunnut tamanut paasissutissiissutiginiarlugu.

Qillerinermi ajutooriasaartoqassagaluarpat Naalagaaffiup akisussaaffigaa, maannamullu uuliamik suli nassaartoqanngilaq, Naalakkersuisut siulittaasuat Kuupik Kleist naqissusiivoq:

- Uanga naliliinera malillugu, avatangiisinik illersuiniaqatigiit tusaqqusaaginnarlutik iliuuseqarput. Taamaaliortarnerallu qangali ilisimalereerparput. Nunaminni pissutsit qiviaqqaartariaqaraluarpaat, tassami Danmarki ullut tamaasa uuliamik tonserpassuarnik qalluivoq. Taakku oqaatsimik ataasinnguamilluunnit eqqaaneqarneq ajorput, Kuupik Kleist oqarpoq.

- Misiliilluni qillerinerit siulliit akuerineqartut sikunnginnerani unitsinneqartussaasut Naalakkersuisunit naqissuserneqarnikuuvoq, taamaaliorput qillerinermi ajutoortoqassagaluarpat sikunnginnerani saliinissat piniassammata, Ove Karl Berthelsen oqarpoq.

Septemberi naatinnagu qillerinerit kingulliit akuerineqartut naammassereerneqarsimassapput. Piffissaqarluarpullu, Ove Karl Berthelsen oqarpoq:

- Septemberip naaneraniit novembarip naaneranut piffissarititaavoq, avannaata sikunnginnera angumerineqarsinnaalluni, naatsorsuutigineqarpoq piffissaq taanna angumerineqarsinnaasoq, Ove Karl Berthelsen oqarpoq, nangillunilu:

- Angumersinissamut pissutaasut ilagaat immami itivallaanngitsumi aammalu immap naqqaniit ammut itivallaanngitsumi qillerisoqartussaammat. Tamannarpiarlu pissutigalugu uuliasioqatigiiffiup piffissaq sivikinneq atortussaassavaa, Aatsitassanut Naalakkersuisoq naggasiilluni oqarpoq.