Cairn Energy Nuummut tikeraarpoq
Uuliamik nassaartoqassappat, uuliamik qalluinissaq ukiup sikuanit unitsinneqarnavianngitsoq, Cairn Energymi pisortat oqaatigaat.
Qeqertarsuup kitaani uuliamik misiliilluni qillerinissat Naalakkersuisut sapaatip akunnera kingulleq akuersissutigaat.
Kalaallit Nunaata sineriaani uuliaqarluarnera eqqoriaanerinnaagaluartoq, taamaattoq uuliamik nassaartoqassappat ukioq naallugu qalluisarnissartik Cairn Energyp naatsorsuutigaa - qanorluunniit sikoqartigigaluarpat. Taama naqissusiivoq Cairn Energyp inatsisitigut aammalu aningaasarsiornermut pisortaa, Simon Thomson.
- Nunani issittuni uuliasiortut suliaasa pilersaarusiorneri paasiniaavigalugit paasivarput ukiuugaluartumi uuliamik qalluisoqarsinnaasoq. Taamaattumik paasisavut najoqqutaralugit uuliamik nassaassagutta ukioq naallugu qalluinissarput ilimagineqarsinnaavoq, Simon Thomson oqarpoq.
Kalaallit Nunaata sineriaani uuliamik misiliillutik qillerinissaminnut sooq pilersaarnertik Cairn Energyp aamma tamanut saqqummiuppaa:
- Uulia eqqarsaatigalugu Kalaallit Nunaata imartaa suli iluamik misissorneqanngilaq, tamannalu Kalaallit Nunaannit Cairn Energymut iluarisimaarnermik takutitsivoq. Kalaallit Nunaata takutinniarpaa maani uuliamik ujaasineq imminut akilersinnaasoq. Imminut akilersinnaassappat iluanaarutinik avitseqatigiinnissaq pisariaqarpoq, Simon Thomson oqarpoq.
Siunissaq ungasinnerusoq eqqarsaatigalugu, Cairn Energyp naatsorsuutigisimanngippagu aningaasaliinertik 3 milliardit koruuniusoq, imminut akilersinnaanngitsoq, taava maaniisanngikkaluarput, Simon Thomson naqissusiivoq.
- Suliniaqatigiiffiit arlallit maaniinnerput kissaatiginngilaat. Naak Naalakkersuisut aammalumi inuiaqatigiit amerlanersaasa maaniinnerput ajorinngikkaluaraat, Simon Thomson oqarpoq.
Taamaattoq suliniaqatigiiffiit arlallit qularput. Tamakkununnga ilaapput KNAPK, Avataq ICC-lu. Suliniaqatigiiffiilli isornartorsiuinerat Simon Thomsonip qatangiinnarpaa:
- Soorunami kikkut tamarmik isornartorsiuisinnaapput, kisianni erseqqissarusuppara massakkut maaniikkatta Naalakkersuisunit qaaqquneqarluta. Cairn Energyp Naalakkersuisut peqqussutaat malippaat. Aamma Cairn Energyp uuliamik qalluinissami isumannaallisaanerit annerpaat malippaat. Isumannaallisaaneq pingaartittuarsimavarput, aammalu siunissami taamaatuassalluta, Cairn Energyp inatsisitigut aammalu aningaasarsiornermut pisortaa, Simon Thomson oqarpoq.
