Cairn Energy kalaallinik sulisussarsiortarsimagaluarpoq
Skotlandimiut uuliasiortitseqatigiiffiat sulisartunik nunatsinneersunik sulisussarsiortarsimagaluarpoq allatulli ajornartumik sulisartunik Europameersunik atorfinititsisariaqartarsimapput, tamannalu Cairn Energyp Atlantikup avannaanut immikkoortortaqarfiani pisorap Ian Wattsip ajuusaannartippaa, taassumami ikinnerpaammik sulisartut 10 procentii nunaqavissuunissaat kissaatiginartikkaluaramiuk.
- Nunanit allaneersut amerlasuut saaffiginnittarput suliumallutillu qinnuteqartut amerlanerit qallunaat nunaanneersuusarput, tamannalu siunertaanngikkaluarpoq, Ian Watt aviisimi Sermitsiami apersorneqarluni oqarpoq.
Suliassat ilai ilinniagaqanngikkaluarluni suliarineqarsinnaapput suliassat allat ilinniagarluni atsaat suliarineqarsinnaallutik.
Uuliasiorfinni sulilernissamut akissarsiat qaffasinneruneranik sulerusilersitsisinnaasarput, taamaattumik uuliasiortitseqatigiifiup Cairnip paasisinaanngilaa sulisussarsiortoqartillugu nunaqavissut sooq qinnuteqarneq ajornerat.
- Kalaallit inuusuttut nunagisami najugaqarfimmiluunniit qanittuini sulinissartik kissaatiginartinnerugaat isumaqarpunga, Ian Watt oqarpoq.
Uuliamik qillerivinni suligaanni piareersimaffigineqartariaqarpoq qillerisarnerit sivikitsukkuutaartumik pisarmata allamullu nuuttaqattaartoqartarmat. Piffissap sivikitsup ingerlanerani Kalaallit Nunaanni sulisoqarsinnaavoq immaqalu sapaatip akunnerata tulliani Brasiliami sulisoqarsinnaalluni, Ian Watt oqarpoq.
Nunaqavissut sulisorineqarnissaannut aporfiusinnaasoq tassaavoq, Skotland-imiut uuliasiortitseqatigiiffiata piumasarimmagu tassani suliniaraanni tuluttut oqalussinnaanissaq. Tamannalu pingaaruteqarpoq isumannaallisaanermut piumasaqaatit tuluttut allassimammata.
Uuliasiortitseqatigiiffik Cairn Energy 2010mi aamma 2011-mi arfineq pingasoriarluni nunatta kitaani qillerivoq ukiunilu amerlasuuni qillerisarniarluni pilersaaruteqarpoq.
