Cairn Energy iluareqqusaarluni aallartilerpoq
Uuliasiortitseqatigiiffik iluareqqusaarnerminni illoqarfiit sisamat aqqusaassavaat.
Marlunngorpat tulliani, tassa marsip 15-ani Ilulissani paasisitsiniaariarlutik, pingasunngorpat Aasiaat innuttaannut paasisitsiniaassapput, aqaguani sisamanngornermi, marsip 17-anni Kangerlussuarmi innuttanut paasisitsiniaassallutik. Illoqarfiit tikinneqartussat kingullersarissavaat Nuuk, tassani arfininngornermi marsip 19-ani tamanut ammasumik paasisitsiniaasoqassalluni.
Paasisitsiniaanerni innuttaasut Cairn Energymut aamma NunaOil-imut apeqquteqarsinnaassapput.
NunaOil Cairn Energyp nunatta sineriaani qillerinermut akuersissutaani 12,5 procentimik piginneqataavoq.
Cairn Energy-mit oqaatigerusunneqanngikkallarpoq ataatsimeeqattaartitsinerni kina peqataatissaneritsik, NunaOil-miilli peqataassaaq, misissuinerni akisussaasoq, Stig-Morten Knutson.
Paasisitsiniaanerni eqqartorneqartussat ilagaat, Avatangiisinut Sunniutaasinnaasunik Misissuineq aamma Inuiaqatigiinnut Sunniutaasinnaasunik Misissuineq. Tassalu taakku paasinarsisissavaat qillerinerit nunatsinnut qanoq kinguneqassanersut.
Tassalu taakkorpiaapput Cairn Energyp innuttaasunut paasisitsiniaanissaannut sunniuteqarnerpaasimasut. Aammalu illoqarfiit sisamat maannamut paasisitsiniaaffiusussat tassaapput qillerinerit nalaanni taakkununnga malunnarnerpaamik pisoqarfiussanera, Cairn Energyp Nunatsinni aallartitaata, Kuno Fencherip oqaatigaa.
Taassuma KNR-imut naqissuserpaa, qillerinerni aammalu pilersaarutini inuiaqatigiit malinnaatinneqarnissaat Cairn Energymut pingaaruteqarmat.
Ullualunnguit qaangiuppata, nunatsinni inuussutissarsiortut periarfissaarutissapput Cairn Energyp nunatsinniinnerata nalaani aningaasarsiorfigisinnaanissaanut, tassami tallimanngorpat marsip aqqarnanni suliffeqarfiit sunik sullissisinnaanerminnik neqeroorutissaat Cairn Energymit misissorneqarlutik suleqatigiissinnaanerminnik isumaqatigiissusiornissaat suliarineqalissammata.
