Cairn Energy - Annaasaqarnissaminut sapiissuseqartoq

Assersuutigalugu Amerikami præsidentiusimasoq Tuluit Nunaannilu ministeriunerusimasoq pisortaata ikinngutaannut ilaapput. Piginneqatigiiffik, nunatta siunissaanik allanngortitsisinnaasoq, ilisaritipparput.

Uuliasioqatigiiffik Cairn Qeqertarsuup kitaani qanittukkut uuliasiorluni qillerinialerpoq. Sunaliuna taanna suliffeqarfik?

Cairn Energy 1981-imi pilersinneqarpoq, tassalu aappaagu ukiuni trediveni atareersimassalluni. Pilersitsisua, Bill Gammell, George W. Bushimik Tony Blairimillu ikinnguteqartoq, suli qullersatut inissisimavoq. Taanna uuliasiornermik aallutaqalinngikkallarami, rugbymik arsartartuuvoq, skottit nunanut allanut unammisartuini marlussoriarluni unammeqataaasimalluni.

Gammell-illi uuliasiornermi aallartinnini sakkortunaarpaa, uuliaqarfiit aningaasaliiffigisai arlallit naleqangaanngimmata.

Cairnip Indiami uuliaqarfik '90-ikkut qiteqqunneranni uuliasiorfigileramiuk aatsaat ingerlallualerpoq, taanna uuliaqarluarmat.

Cairn Energy Indiami, Bangladeshimi, Nepalimi, Albaniami kiisalu Tunesiami ullumikkut ingerlataqarpoq.

Tassalu Nunatsinniilernissaa tullinnguuppoq. Cairn immami qllerinermik misilittagaqaraluarluni, nunami uuliasiormernik annermik misilittagaqarpoq

Cairn Energy uuliasiortunut allanut naleqqiulluni suliffeqarfeerannguuvoq. BP, Mexicop kangerliumarnani maqisoorluni ulluni makkunani ajornartorsioqisoq, nunarsuarmi annerpaat arfinilissaraat. Taanna 1400 milliardi koruunit sinnerlugit siorna kaaviiaartitsivoq. Cairn ukioq taanna 1,4 milliardinik kaaviiaartitsilluni, BP-p 1000-terarterutaatut angissuseqarpoq.

BP Mexicop kangerliumarnani mingutsitsinersuarmik saliilluni maannamut 8 milliardi koruunit atoreerai tamatumunnga atatillugu eqqaasinnaavarput.

Cairn Energy-li piginneqatigiiffiuvoq, ajutoorutaasinnaasunik aallutaqartartoq.

Atuagassiap aningaasarsiorneq pillugu allaaserisaqartartup ataqqisaasup Forbesip Cairn qitsuttut nujuartatut taanikuuaa, uuliasioqatigiiffiit allat ilimaginngisaanni uuliarsiortarmat.

Cairn Energy-p qitiusumik allaffeqarfia skotlandimi Edinburghimiippoq.

KNR-ip Cairn Energy ullumi attaveqarfigaa, kisianni Naalakkersuisut akuersissuteqarnerat suli oqaseqarfigerusunngilaa.

Kisianni piginneqatigiiffiup 2009-mi ukiumoortumik nalunaarutaani

Bill Gammell allappoq, nunatta imartaani uuliamik nassaarnissamut, qasujuissuseq, piginnaasaqarluarneq iluatsitsinerlu pisariaqartut.