Bussinut qimuttuitsunullu tapiisaleqqinnissaq misissuiffigineqalerpoq
Ilinniartitaaneq 2005-imi aaqqissuiffigeqqinneqarmat ilinniartut angallannermut atuakkanillu pisiniarnerini tapiissutaasartut peerneqarput, tamatumalu kingorna ajornartorsiutinngortut Ilinniartut Kattuffianni eqqartorneqartarput, ingammik peqatigiiffiup Avalaap angallannermut, atuakkanillu pisiniarnerni tapiissutaasartut uterteqqinnissaat sorsuutigiuarsimavaa, aningaasanimmi taarsigassarsisinnaaneq eqqunneqaraluarmat atuakkanik pisisinnaanermut angallannermulluunniit isumannaarinissamut iluaqutaasimanngitsoq oqaatigiuarsimavaat.
Juliane Henningsenip apeqqutaanut tunngatillugu januaarimi ilinniartut kattuffiinik oqaloqateqarnissami tamakku eqqartorneqarumaartut naalakkersuisup, Mimi Karlsenip akissutaani atuarneqarsinnaavoq.
Aamma bussinut qimuttuitsunulluunniit tapiissutit eqquteqqinneqassagaluarpata nunatta karsianut sunniuteqarpallaarani ilinniartunulli iluaqutaassaqisoq, naalakkersuisup akissutaani atuarneqarsinnaavoq.
Nunatta karsiata aningaasartuutissai 54.000 koruuniussapput, tassami aaqqiissutissaq kalaallinut sivisunerusumik ilinniagaqartunut kisimi atuutissammat. Kalaallit inuusuttuaqqat atuariartortut, kiisalu inuussutissarsiutitigut ilinniariartut angallannermut tapiissutisinissaat qulakkeerneqareernikuummat.