Brugseni nutaamik pisortartaassasoq
Susanne Christensen Kalaallit Nunaanni Brugsenimi pisortaq soraarniuteqarluni nalunaaruteqarpoq.
Brugseni tusagassiuutinut nalunaarummi allappoq.
Susanne Christensen Brugsenimi 1991-imili sulilerpoq, 2013-imilu pisortanngorluni.
- Susanne ukiorpassuarni Brugsenip ineriartorneranut qulakkeerinneqataavoq, Brugsenimi naleqartitat piujuartitsinerlu pingaartilluinnarlugit. Taamatuttaaq Susannep qulakkeerpaa Brugsenip nunatsinni suliffeqarfinni sulisut iluarisimaarnerinik siuttooqataanera, siulersuisut siulittaasuat, Avijâja Rosing-Olsen tusagassiuutinut nalunaarummi allappoq.
Siulersuisut maanna Brugsenimi piukkunnartumik pisortassarsiortussanngorpoq. Pisortamik nutaamik atorfinittoqarnissaata tungaanut Kent Helberg pisortaagallassaaq.
- Maanna nukit nutaat atorfissaqartilerpavut, Brugsenimi anguniakkat tullii angujumallugit, Avijâja Rosing-Olsen oqarpoq.