Brugseni 11 millionit pallillugit sinneqartoorpoq

KNB-ip siulittaasuata Ib Lennert Olsenip angusaq iluaraa.

- Ukioq manna Nuuk Centerip ammarneratigut unammillerneq sakkortusivoq. Nuullu avataani illoqarfinni innuttaasut pisissutigisinnaasaat aningaasat ukioq manna ikiliartorsimapput. Tamakku tunngavigalugit, angusaq siulersuisut iluarisimaarpaat, siulittaasoq oqarpoq.

Aamma erseqqissarpaa, Brugsenip sinneqartoorutaata ilaminerujussua ilaasortanut nakkartartoq.

- Ilaasortagut agguagarsisittarpagut. 2012-imi naatsorsuutinut atatillugu ilaasortatsinnut 7 millioner kronit missaat januarimi akiliutigaavut. Pisisartutta aamma ilaasortaasut nalunngilaat Brugsenimi niuerneq akilersinnaalluartoq.

Ib Lennert Olsen oqarpoq, illoqarfinni arfineq marlunni ilaasortaminit 30.000-init  Brugseni 100%-imik pigineqartoq.

- Ilaatigut tamanna tunngavigalugu inuiaqatigiinnut akisussaaffipput pimoorullugu ingerlapparput. Kalaallit nammineq nerisassaataat ineriartortillugit tunineqarnissaat annertuumik sammivarput, tunisassiornissamik isumassarsillaqqissut nioqqutissiortullu qanimut suleqatigalugit. Suliffinnik aningaasanillu nunatsinni kaaviaartussanik pilersitseqataanerput, inuiaqatigiinnut iluaqutaalluarpoq. Tamatuma saniatigut aamma inuusuttortatta ilinniartinnissaannut akisussaaffipput naammassiniartuarparput. Sulisutta 10%-iisa ilinniartuunissaanik siunnerfipput, ukioq manna anguvarput. Tamannalu assut tulluusimaarutigaarput, oqarpoq.

Peqqinneq avatangiiserlu ukiuni makkunani aamma Brugsenimit sammineqarpoq. Pisiassat økologisk-it Brugsenini amerliartorput, soorlu aamma nerisassat peqqinnartut neqeroorutigineqartarnerat annertusiartorluni. Timigissarneq peqqinnartoq, tamanit atorneqarsinnaasoq aamma aallunneqarpoq. Pisiniarfiit najukkanilu peqatigiiffiit aaqqissuuttarpaat arpaqatigiittarneq ukiut tamaasa amerliartuinnartunik peqataaffigineqartartoq.