Brugseni 100.000 koruuninik pinnattaassaqartitsilluni atuaqatigiinnut unammisitsilersoq

Meeqqat atuarfiat siunissami qanoq ittuussava? Brugsenip tamanna 8. klassinit 10. klassinut atuartunit siunnersuuteqarfigeqquaa, siunnersuutillu pitsaanersaat aningaasarpassuarnik pinnattaassaqartinneqassaaq, taakkulu assersuutigalugu paasisassarsiorluni angalanissamut imaluunniit qarasaasiatigut atortunut atorneqarsinnaassallutik.
Assi © : Kalaallit Nunaanni Brugseni
Allattoq Camilla Dam
januaarip 27-at 2016 11:15

- Inuusuttut siunissamut takorluugaasa tusarnissaat qilanaaraarput. Ilinniarnissamut pitsaanerpaamut suna pisariaqarpa? Qanorlu ililluta ilinniakkaminnik naammassinnittut amerlanerulersissavagut? Apeqqutit ilaatigut tamakkuusut inuusuttunit akineqassapput, Brugseni taama allaaserisaqarpoq.

Unammisitsineq "Siunissami atuarfik" aqqutigalugu suliffeqarfik inuusuttut peqataatillugit inuiaqatigiinnut iluaqutaasussanik allannguutissanik suliniuteqarusuppoq.

8.-9.-10. klassini atuartut kikkulluunniit siunnersuuteqarsinnaapput, siunnersuutillu kingusinnerpaamik apriilip aallaqqaataani tunniunneqareersimassapput.

Kalaallit Nunaanni Brugsenip nuna tamakkerlugu siulersuisuinut ilaasortat naliliisuussapput ajugaasunillu pingasunik toqqaassallutik. Ajugaasut pilersaarusiaat ilinniartitaanermut, kultureqarnermut, ilisimatusarnermut ilageeqarnermullu naalakkersuisumut Nivi Olsenimut isumassarsiorfissatut ingerlateqqinneqassapput.